سلطان پور، 17 جون (ہ س)۔ اترپردیش کے سلطان پور میں ایم پی ایم ایل اے کورٹ میں راہل گاندھی کے خلاف ہتک عزت کے معاملے کی سماعت منگل کو ملتوی کر دی گئی۔ معاملہ کی اگلی سماعت اب 29 جون کو ہوگی۔

کانگریس لیڈر راہل گاندھی کے وکیل کاشی شکلا نے بدھ کے روز کہا کہ فورنسک لیبارٹری کی جانب سے الزامات کے حصے کے طور پر پیش کی گئی سی ڈی کی آواز کے ساتھ راہل گاندھی کی حقیقی آواز کا موازنہ کرنے کے حوالے سے نظرثانی کی درخواست دائر کی گئی ہے۔ کیس فائل کو نچلی عدالت سے اے ڈی جے کورٹ 5 میں منتقل کر دیا گیا ہے۔

نظرثانی درخواست 25 جون کو اے ڈی جے کورٹ 5 میں سماعت کے لیے مقرر ہے۔ فائل کی عدم دستیابی کے باعث گزشتہ سماعت ملتوی کر دی گئی تھی۔ وہیں، ایم پی ایم ایل اے کورٹ نے ہتک عزت کے اصل معاملہ کی سماعت کے لیے 29 جون کی تاریخ مقرر کی ہے۔

یہ معاملہ 2018 کا ہے۔ کرناٹک اسمبلی انتخابات کے دوران، کانگریس لیڈر راہل گاندھی نے ایک پریس کانفرنس میں اس وقت کے بی جے پی کے قومی صدر اور موجودہ وزیر داخلہ امت شاہ کے خلاف مبینہ طور پر قابل اعتراض بیانات دیے تھے۔ اس بیان سے پریشان ہو کر سلطان پور بی جے پی لیڈر وجے مشرا نے عدالت میں شکایت درج کرائی۔ عدالت نے درخواست منظور کرتے ہوئے مقدمہ چلانے کا حکم دیا۔ راہل گاندھی نے فروری 2024 میں ضمانت حاصل کی اور جولائی میں اپنا بیان ریکارڈ کرایا۔

سماعت کے دوران مدعی کے وکیل وجے مشرا نے درخواست کی کہ راہل گاندھی کے بیان پر مشتمل سی ڈی پر موجود آواز کو فورنسک لیبارٹری میں راہل گاندھی کی اصل آواز سے ملایا جائے۔ نچلی عدالت نے اس درخواست کو مسترد کر دیا، جس کے بعد وجے مشرا کے وکیل سنتوش پانڈے نے اے ڈی جے 5 کی عدالت میں نظرثانی کی درخواست دائر کی۔

---------------

ہندوستان سماچار / عبدالسلام صدیقی