فیروز آباد، 17 جون (ہ س)۔ لائن پار تھانہ علاقے کے تحت واقع گاؤں روپس پور کے قریب بدھ کی شام ڈیڈیکیٹڈ فریٹ کوریڈور (ڈی ایف سی) پر ایک مال گاڑی کے ڈبے میں شدید آگ لگ گئی، جس سے علاقے میں ہلچل مچ گئی۔ اطلاع ملتے ہی ریلوے انتظامیہ، پولیس اور فائر بریگیڈ کی ٹیمیں موقع پر پہنچ گئیں اور سخت جدوجہد کے بعد آگ پر قابو پا لیا۔

ٹنڈلا سے کانپور کی جانب ایک مال گاڑی جا رہی تھی۔ بدھ کی شام جب یہ گاؤں روپس پور کے قریب پہنچی تو اس کے ایک ڈبے میں اچانک آگ بھڑک اٹھی۔ تھوڑی ہی دیر میں آگ نے خوفناک شکل اختیار کر لی۔ آگ اتنی تیزی سے پھیلی کہ دور دور تک دھوئیں کے بادل دکھائی دینے لگے۔ واقعے کی اطلاع ملتے ہی دیہاتی بڑی تعداد میں موقع پر جمع ہو گئے۔

اطلاع ملتے ہی فائر بریگیڈ کی چار گاڑیاں موقع پر پہنچیں اور آگ بجھانے کی کارروائی شروع کر دی۔ آگ کی سنگینی کو دیکھتے ہوئے متعدد تھانوں کی پولیس، ریلوے سکیورٹی فورس، سرکاری ریلوے پولیس کے علاوہ ریلوے کے سینئر افسران اور ملازمین بھی جائے وقوعہ پر پہنچ گئے۔ پورے علاقے کو حفاظتی حصار میں لے کر راحت اور بچاؤ کا کام انجام دیا گیا۔ فائر بریگیڈ کے اہلکاروں نے کئی گھنٹوں کی مسلسل محنت کے بعد آگ پر قابو پا لیا۔ اس واقعے میں کسی قسم کا جانی نقصان نہیں ہوا، جس پر انتظامیہ اور مقامی لوگوں نے اطمینان کا اظہار کیا۔

چیف فائر آفیسر ستیندر پانڈے نے بتایا کہ مال گاڑی کے ایک ڈبے میں آگ لگی تھی، جس میں چار پہیہ گاڑیاں لدی ہوئی تھیں۔ آگ لگنے کے بعد حفاظتی نقطۂ نظر سے ڈی ایف سی کے ایک راستے پر عارضی طور پر آمد و رفت روک دی گئی تھی۔ تاہم دوسرے راستے پر ٹرینوں کی آمد و رفت معمول کے مطابق جاری رہی۔

ہندوستھان سماچار

---------------

ہندوستان سماچار / عبدالواحد