جموں, 17 جون (ہ س)۔ ضلع راجوری کے تھانہ منڈی علاقے کے گاؤں بہروٹ میں زمین کے تنازع پر ایک شخص کو مبینہ طور پر اس کے سگے بھائی نے قتل کر دیا۔پولیس ذرائع کے مطابق 45 سالہ منیر حسین ولد حسن محمد منگل کی شام اپنے گھر کے قریب واقع زمین پر تعمیراتی کام کر رہا تھا کہ اسی دوران اس کے بھائی محمد رزاق اور دیگر اہل خانہ نے زمین کی ملکیت کے تنازع کو لے کر اعتراض کیا۔ اس دوران دونوں فریقوں کے درمیان شدید تکرار ہوئی جو بعد میں پرتشدد جھگڑے میں تبدیل ہو گئی۔

الزام ہے کہ جھگڑے کے دوران منیر حسین پر ایک بھاری تیز دھار ہتھیار سے حملہ کیا گیا جس کے نتیجے میں وہ شدید زخمی ہو گیا۔ زخمی کو فوری طور پر سب ڈسٹرکٹ اسپتال تھانہ منڈی منتقل کیا گیا، جہاں سے اسے گورنمنٹ میڈیکل کالج اسپتال راجوری ریفر کیا گیا، تاہم وہ دورانِ علاج زخموں کی تاب نہ لاتے ہوئے دم توڑ گیا۔

اہل خانہ کے مطابق دونوں بھائیوں کے درمیان زمین کا تنازع کئی برسوں سے جاری تھا اور ماضی میں بھی اس معاملے پر متعدد بار جھگڑے ہو چکے تھے۔ انہوں نے دعویٰ کیا کہ مقتول پر کلہاڑی سے حملہ کیا گیا۔

ادھر پولیس نے لاش کو تحویل میں لے کر پوسٹ مارٹم سمیت قانونی کارروائی شروع کر دی ہے۔ پولیس تھانہ تھانہ منڈی میں مقتول کے بھائی اور خاندان کے دو دیگر افراد کے خلاف قتل کا مقدمہ درج کر لیا گیا ہے جبکہ معاملے کی مزید تحقیقات جاری ہیں۔

ہندوستھان سماچار

---------------

ہندوستان سماچار / محمد اصغر