پریاگ راج میں ایک ہی خاندان کے تین لوگوں کا قتل

۔ واقعے کا جلد انکشاف کرنے کے لیے کئی ٹیمیں تشکیل، ہر پہلو کی باریکی سے جانچ جاری: ڈی سی پی ویویک چندر یادو

پریاگ راج، 16 جون (ہ س)۔ اترپردیش کے پریاگ راج ضلع میں واقع میجا تھانہ علاقے کے ککرہٹا گاوں میں پیر کی رات ایک ہی خاندان کے تین لوگوں کو قتل کر دیا گیا۔ منگل کے روز اطلاع ملنے پر پولیس محکمے کے حکام موقع پر پہنچے اور جانچ شروع کر دی ہے۔ ڈپٹی کمشنر آف پولیس یمنا نگر ویویک چندر یادو نے بتایا کہ میجا تھانہ علاقے کے ککرہٹا گاوں کے رہائشی شیام لال گپتا (60)، امراوتی دیوی (40) اور اندراوتی دیوی (42) کی لاشیں گھر کے باہر منگل کی صبح لہولہان حالت میں ملیں۔

اطلاع ملنے پر پہنچی پولیس ٹیم نے تینوں لاشوں کو قبضے میں لے کر جانچ شروع کر دی ہے۔ تینوں متوفیان کے سر پر شدید چوٹوں کے نشانات ملے ہیں۔ ابتدائی جانچ میں خدشہ ظاہر کیا جا رہا ہے کہ کسی بھاری چیز سے حملہ کر کے ان کا قتل کیا گیا ہے۔ پوچھ گچھ میں معلومات ملی ہیں کہ خاندان کے باقی تمام ارکان روزگار کے سلسلے میں باہر رہتے ہیں۔ منگل کی صبح جب مقامی لوگوں نے گھر کے باہر تینوں کی لاشیں پڑی دیکھیں تو فوراً پولیس کو اطلاع دی۔

ڈپٹی کمشنر آف پولیس یمنا نگر ویویک چندر یادو نے بتایا کہ اطلاع ملتے ہی میجا پولیس، فارنسک ٹیم اور سینئر حکام موقع پر پہنچ گئے۔ جائے وقوعہ کا باریک بینی سے معائنہ کر کے ضروری شواہد اکٹھے کیے جا رہے ہیں۔ معاملے کی سنگینی کو دیکھتے ہوئے خصوصی پولیس ٹیمیں تشکیل دی گئی ہیں۔ پولیس واقعے کے تمام ممکنہ پہلووں پر جانچ کر رہی ہے۔ آس پاس کے لوگوں سے پوچھ گچھ کی جا رہی ہے نیز تکنیکی اور سائنسی شواہد کی بنیاد پر بھی جانچ کو آگے بڑھایا جا رہا ہے۔ قصورواروں کی شناخت کر کے ان کی گرفتاری کے لیے پولیس کی کئی ٹیمیں سرگرم کر دی گئی ہیں۔ پولیس واقعے کے جلد اور کامیاب انکشاف کے لیے پرعزم ہے۔ جانچ کے دوران ملنے والے حقائق کی بنیاد پر مزید قانونی کارروائی کی جائے گی۔

ہندوستھان سماچار

--------------

ہندوستان سماچار / انظر حسن