مسقط (عمان)/تہران (ایران)/واشنگٹن (امریکہ)/نئی دہلی (ہندوستان)، 11 جون (ہ س)۔ امریکہ اور ایران کے حملوں کے درمیان آج عمان سے ہندوستان کے لیے افسوسناک خبر آئی۔ بھارتی حکومت نے عمان میں تجارتی جہاز پر حملے کی تصدیق کر دی ہے۔ جہاز میں 20 ہندوستانی ملاح سوار ہیں۔ راحت یہ ہے کہ سب محفوظ ہیں۔ امریکی حملوں کے جواب میں ایرانی فوج نے ڈرون اور میزائل داغ کر بحرین، کویت اور اردن کو ہلا کر رکھ دیا ہے۔ پورا مشرق وسطیٰ کشیدگی سے لرز اٹھا ہے۔ چین نے تمام فریقوں سے پیچھے ہٹنے کی اپیل کی ہے۔ ایران نے کہا ہے کہ اس نے آبنائے ہرمز کو مکمل طور پر بند کر دیا ہے۔

ٹائمز آف عمان، الجزیرہ، گلف نیوز، سی بی ایس نیوز اور سی این این کی رپورٹوں کے مطابق ہندوستان نے امریکہ سے خلیج فارس میں بحری جہازوں پر حملے روکنے کا مطالبہ کیا ہے۔ اس حملے سے قبل اسی طرح کے ایک واقعے میں تین ہندوستانی ہلاک ہو گئے تھے۔ بھارت نے سخت تشویش کا اظہار کرتے ہوئے امریکہ سے آبنائے ہرمز کے قریب بحری جہازوں پر حملے روکنے کی اپیل کی ہے۔

آج نئی دہلی میں ایک پریس کانفرنس میں ہندوستانی وزارت خارجہ کے ترجمان رندھیر جیسوال نے کہا کہ ایم ٹی سیٹبیلو جہاز پر حملے کے بعد امریکہ کے سامنے سخت احتجاج درج کرایا گیا ہے۔ ہندوستانی وزارت خارجہ کے سکریٹری اسیم مہاجن نے یہ بھی بتایا کہ ایک اور تجارتی جہاز ایم ٹی جلویر پر بھی آج عمان کے ساحل پر حملہ کیا گیا۔ گنی بساو کے جھنڈے والے اس جہاز میں عملے کے 20 ہندوستانی ارکان سوار تھے۔ سبھی محفوظ بتائے جارہے ہیں۔

عمان میں ہندوستانی سفارت خانے نے کہا ہے کہ وہ شمالی عمان میں شناس بندرگاہ کے قریب ایک بحری جہاز کے حادثے کی قریب سے نگرانی کر رہا ہے اور عملے کی حفاظت کو یقینی بنانے کے لیے مقامی حکام کے ساتھ رابطہ کر رہا ہے۔ سفارت خانے نے تصدیق کی کہ ایم ٹی جلویر کے عملے کے ارکان کو عمان کی رائل نیوی کی مدد سے بحفاظت نکال لیا گیا ہے۔ قابل ذکر ہے کہ شناس بندرگاہ عمان کی شمالی البطینہ گورنری میں واقع ہے اور ملک کی سمندری تجارت کا ایک اہم مرکز ہے۔

موجودہ صورتحال پر ایرانی عہدیدار نے کہا کہ جب تک امریکہ ایران کے مفادات کا احترام نہیں کرتا جنگ جاری رہے گی۔ اہلکار محمد مخبر نے کہا کہ ایران مستقبل میں کسی بھی امریکی حملے کا مزید سخت اور طاقت سے جواب دے گا۔ جنگ کے نتائج کا انحصار واشنگٹن کے اقدامات پر ہوگا۔ ایران کی وزارت خارجہ نے ملک پر امریکی حملوں کی مذمت کرتے ہوئے کہا ہے کہ اس سے جنگ بندی بے معنی ہو گئی ہے۔ اس دوران، اسلامک ریولیشنری گارد کارپس (آئی آر جی سی) نے کویت، بحرین اور اردن پر بیک وقت حملے کیے ہیں۔

امریکی فوج بھی ایرانی شہروں پر فضائی حملے کر رہی ہے۔ یہ حملے بندر عباس کے بندرگاہی شہر، جزیرہ قشم اور تہران کے مغرب میں واقع سرک، مناب اور کرج جیسے جنوبی شہروں پر ہوئے ہیں۔ ایران کی مہر خبررساں ایجنسی نے رپورٹ دی ہے کہ ایرانی فوج نے آبنائے ہرمز کو تمام بحری جہازوں بشمول آئل ٹینکرز اور تجارتی جہازوں کے لیے مکمل طور پر بند کرنے کا حکم دیا ہے۔ چین نے مداخلت کرتے ہوئے مشرق وسطیٰ میں فوجی کارروائی روکنے کا مطالبہ کیا ہے۔

وزارت خارجہ کے ترجمان لن جیان نے صحافیوں کو بتایا کہ چین متعلقہ فریقوں سے اپیل کرتاہے کہ وہ فوری طور پر فوجی کارروائی بند کریں، بات چیت اور مذاکرات کی طرف واپس آئیں، متعلقہ ممالک کی ثالثی کی کوششوں کا مثبت جواب دیں اور جلد از جلد ایک جامع اور دیرپا جنگ بندی تک پہنچ جائیں۔

امریکی سینٹرل کمانڈ (سینٹکام) نے کہا کہ اس نے ایران پر حملوں کا ایک اور دور شروع کیا ہے۔ اس سے قبل بدھ کو صدر ڈونلڈ ٹرمپ نے کہا تھا کہ تہران نے معاہدے پر بات چیت کرنے میں بہت زیادہ وقت لیا ہے اور وہ اس کی قیمت ادا کرے گا۔ اردن کی فوج نے کہا کہ اس نے اس علاقے کی طرف جانے والے 20 ایرانی میزائلوں کو روکنے کی کوشش کی جہاں امریکی فوجی اڈہ واقع ہے۔

مشرق وسطیٰ پر چھائے ہوئے جنگ کے بادلوں کے درمیان، پاکستان کی وزارت خارجہ نے جمعرات کو کہا کہ تنازعات میں اضافے کے باوجود، ملک کے رہنما امریکہ اور ایران جنگ کے خاتمے کے لیے ثالثی کی کوششوں میں مصروف ہیں۔ وزارت خارجہ کے ترجمان طاہر اندرابی نے صحافیوں کو بتایا، دشمنی کے نئے مرحلے میں پر امید رہنا مشکل ہے۔ ہم نے امید نہیں ہاری، ہم کوشش کر رہے ہیں۔ اس دوران بحرین میں ایرانی ڈرون کو روکنے کے بعد ایک لڑکی کے زخمی ہونے کی اطلاع ہے۔ ملک کی وزارت داخلہ کے مطابق، جمعرات کو بحرین کے اوپر ایک ایرانی ڈرون کو روکنے کے دوران ایک 11 سالہ لڑکی کو معمولی چوٹیں آئیں۔ وزارت داخلہ نے کہا کہ بحرین میں ایرانی ڈرون کے ملبے نے حماد ٹاون اور منامہ میں مکانات کو نقصان پہنچایا اور کاروں کو آگ لگا دی۔

سعودی عرب نے مشرق وسطیٰ کی جنگ پر پاکستان اور قطر کی ثالثی میں مزید مذاکرات کا مطالبہ کیا ہے۔ سعودی عرب نے جمعرات کو بحرین، اردن اور کویت پر ایران کے حملوں کی مذمت کی اور مشرق وسطیٰ کی جنگ کے خاتمے کے لیے پاکستان اور قطر کی ثالثی میں مذاکرات کی بحالی پر زور دیا۔ سعودی وزارت خارجہ نے تحمل سے کام لینے کی اپیل کی۔

---------------

ہندوستان سماچار / عبدالسلام صدیقی