بی جے پی بنگال کے لوگوں کے خوابوں کو پورا کرنے میں کوئی کسر نہیں چھوڑے گی : مودی

۔ بنگال کی جیت ترنمول کے خوف پر مودی جی پر اعتماد کی جیت ہے: امت شاہ

نئی دہلی، 04 مئی (ہ س)۔ بھارتیہ جنتا پارٹی کی جیت پر مغربی بنگال کے عوام کا شکریہ ادا کرتے ہوئے وزیر اعظم نریندر مودی نے کہا کہ پارٹی مغربی بنگال کے لوگوں کے خوابوں اور امنگوں کو پورا کرنے میں کوئی کسر نہیں چھوڑے گی۔ وزیر اعظم نے ایک ایکس پوسٹ میں انتخابات کو ناقابل فراموش اور نتائج کو عوامی طاقت کی جیت قرار دیا۔ بنگال کے عوام سے ان کی جیت پر اظہار تشکر کرتے ہوئے، انہوں نے کہا کہ بی جے پی کی اچھی حکمرانی کی پالیسی کو ان کا بے پناہ آشیرواد حاصل ہوا ہے۔

انہوں نے یقین دلایا کہ بی جے پی مغربی بنگال کے لوگوں کے خوابوں اور امنگوں کو پورا کرنے میں کوئی کسر نہیں چھوڑے گی۔ ڈبل انجن والی حکومت معاشرے کے تمام طبقات کے لیے یکساں مواقع اور احترام کو یقینی بنائے گی۔ بی جے پی کے سرکردہ رہنما نے اس جیت کو کئی دہائیوں کی انتھک کوششوں اور محنتی کارکنوں کی جدوجہد کا نتیجہ قرار دیتے ہوئے کہا کہ وہی ہماری پارٹی کی اصل طاقت ہیں۔

اس دوران، وزیر داخلہ امت شاہ نے کہا کہ بنگال کے لوگوں نے دراندازوں اور ان کے ہمدردوں کو سبق سکھایا ہے جسے خوش کرنے کی سیاست کرنے والی پارٹیاں کبھی نہیں بھولیں گی۔ بنگال نے مودی جی کی قیادت میں جو امیدیں اور آرزوئیں رکھی ہیں، ہم ان کو ضرور پورا کریں گے۔ شاہ نے کہا، یہ ترنمول کے 'خوف' پر مودی جی پر 'اعتماد' کی جیت ہے۔ میرے جیسے ہر بی جے پی کارکن کے لیے یہ فخر کا لمحہ ہے کہ آج گنگوتری میں ماں گنگا کی گود سے لے کر گنگا ساگر تک، ہر جگہ بی جے پی کا بھگوا جھنڈا فخر سے لہرا رہا ہے۔

شاہ نے کہا، بی جے پی بنگال کی کھوئی ہوئی شان کو بحال کرنے کے لیے دن رات کام کرے گی، چیتنیہ مہا پربھو، سوامی وویکانند، کوی گرو ٹیگور، نیتا جی سبھاش چندر بوس اور ڈاکٹر شیاما پرساد مکھرجی جیسے عظیم شخصیات کی تاریخی سرزمین اور 'سونار بنگلہ' کے خواب کو شرمندہ تعبیر کرے گی۔‘‘

انہوں نے کہا کہ یہ جیت ان گنت کارکنوں کی قربانیوں، جدوجہد اور لگن کا نتیجہ ہے۔ یہ ان خاندانوں کے صبر کی فتح ہے جنہوں نے تشدد سہنے کے باوجود زعفرانی پرچم کو نہیں چھوڑا۔

---------------

ہندوستان سماچار / عبدالسلام صدیقی