اے ایم یو کی جے این میڈیکل کالج لائبریری میں پانچ روزہ کتب نمائش کا آغاز
علی گڑھ، 04 مئی (ہ س)۔ علی گڑھ مسلم یونیورسٹی کے جے این میڈیکل کالج کی فیکلٹی لائبریری میں پانچ روزہ کتب نمائش کا آغازہوا۔ یہ نمائش جے پی برادرز میڈیکل پبلشرز، نئی دہلی کے اشتراک سے منعقد کی گئی، جس کا افتتاح پروفیسر محمد خالد، ڈین فیکلٹی آف میڈیسن، اور پروفیسر انجم پرویز، پرنسپل و سی ایم ایس، جے این میڈیکل کالج نے کیا۔ انہوں نے جدید طبی لٹریچر کی اہمیت پر زور دیتے ہوئے کہا کہ یہ کلینیکل علم، تحقیقی صلاحیت اور پیشہ ورانہ مہارت کو بہتر بنانے میں اہم کردار ادا کرتا ہے۔
اس موقع پر یونیورسٹی لائبریرین پروفیسر نشاط فاطمہ، اعزازی لائبریری آفیسر پروفیسر سلمان خلیل اور اسسٹنٹ لائبریرین جناب عقیل احمد بھی موجود تھے۔ اس کے علاوہ اساتذہ، پی جی ریزیڈنٹس اور طلبہ کی بڑی تعداد نے شرکت کی اور نمائش میں شامل کتابوں میں گہری دلچسپی کا مظاہرہ کیا۔
ہندوستھان سماچار
--------------
ہندوستان سماچار / سید کامران علی گڑھ
04 May 2026
