جموں, 30 مئی (ہ س)کشتواڑ کی رکن اسمبلی شگن پریہار نے مرکزی وزیر مملکت ڈاکٹر جتیندر سنگھ سے ملاقات کر کے ضلع میں جاری ترقیاتی منصوبوں، بنیادی ڈھانچے کی بہتری اور عوامی فلاح و بہبود سے متعلق مختلف امور پر تفصیلی بات چیت کی۔ملاقات کے دوران شگن پریہار نے کشتواڑ میں سڑک رابطوں کو مزید مستحکم بنانے، بجلی کی فراہمی میں بہتری، صحت اور تعلیم کے شعبوں کو مضبوط کرنے اور سیاحت کے فروغ کے لیے درکار اقدامات پر زور دیا۔ انہوں نے مختلف مرکزی اسکیموں کے مؤثر نفاذ اور زیر التوا ترقیاتی منصوبوں کی بروقت تکمیل کا معاملہ بھی اٹھایا۔

رکن اسمبلی نے پردھان منتری گرام سڑک یوجنا (پی ایم جی ایس وائی)، جل جیون مشن (جے جے ایم)، پردھان منتری آواس یوجنا (پی ایم اے وائی) اور آیوشمان بھارت پردھان منتری جن آروگیہ یوجنا (اے بی-پی ایم جے اے وائی) سمیت متعدد مرکزی معاونت یافتہ اسکیموں کی پیش رفت کا جائزہ پیش کرتے ہوئے عوام کو ان کے مکمل فوائد پہنچانے کی ضرورت پر زور دیا۔ڈاکٹر جتیندر سنگھ نے کشتواڑ کی ہمہ جہت اور متوازن ترقی کے لیے مکمل تعاون کا یقین دلاتے ہوئے کہا کہ مرکزی حکومت خطے میں بنیادی ڈھانچے کی مضبوطی، عوامی سہولیات کی توسیع اور فلاحی پروگراموں کے مؤثر نفاذ کے لیے پرعزم ہے۔ انہوں نے یقین دلایا کہ عوامی مفاد سے وابستہ منصوبوں کو ترجیحی بنیادوں پر آگے بڑھایا جائے گا تاکہ کشتواڑ میں ترقی کی رفتار مزید تیز ہو سکے۔

ہندوستھان سماچار

---------------

ہندوستان سماچار / محمد اصغر