جنوب 24 پرگنہ، 02 مئی (ہ س)۔ جنوب 24 پرگنہ ضلع میں ہفتہ کو ڈائمنڈ ہاربر اسمبلی حلقہ کے چار اور مگراہاٹ مغرب اسمبلی حلقہ کے 11 بوتھوں پر دوبارہ انتخابات پرامن ماحول میں شروع ہوئے۔ پولنگ صبح 7 بجے شروع ہوکر شام 6 بجے تک جاری رہے گی۔

الیکشن کمیشن کی ہدایت پر مگراہاٹ مغرب کے 11 بوتھوں اور ڈائمنڈ ہاربر کے چار بوتھوں میں دوبارہ انتخابات کرائے جا رہے ہیں۔ جن بوتھوں پر ووٹنگ ہو رہی ہے، ان میں مگراہاٹ مغرب کے بوتھ نمبر 46، 126، 127، 128، 142، 214، 215، 216، 230، 231 اور 232 نیز ڈائمنڈ ہاربر کے بوتھ نمبر 117، 179، 194 اور 243 شامل ہیں۔

صبح سے ہی تمام ووٹنگ مراکز پر سخت سیکورٹی انتظامات دیکھنے کو ملے۔ مرکزی فورسز کے جوانوں کے ساتھ ریاستی پولیس بھی مستعدی سے تعینات ہے۔ کسی بھی ناخوشگوار واقعے کو روکنے کے لیے ووٹنگ مراکز کے باہر بھیڑ جمع ہونے پر مکمل پابندی لگائی گئی ہے اور علاقے میں مسلسل گشت کی جا رہی ہے۔

پہلے گھنٹے کی پولنگ کے عمل کے دوران کسی قسم کی بدعنوانی یا ناخوشگوار واقعے کی اطلاع نہیں ملی ہے۔ انتظامیہ نے پورے عمل کو پرامن اور منصفانہ طریقے سے مکمل کرانے کے لیے وسیع انتظامات کیے ہیں۔

ہندوستھان سماچار

---------------

ہندوستان سماچار / انظر حسن