نئی دہلی، 2 مئی ( ہ س ) ۔ مرکزی حکومت نے ہفتہ کے روز کہا کہ مغربی ایشیا میں جاری بحران کے باوجود ایل پی جی ڈسٹری بیوشنز پر سلنڈروں کی کمی کی کوئی اطلاع نہیں ملی ہے اور گھریلو صارفین کو ایل پی جی سلنڈروں کی 100 فیصد سپلائی یقینی بنائی جا رہی ہے۔ وزارت خارجہ خلیجی اور مغربی ایشیا کے خطے میں جاری حالات پر مسلسل نظر رکھے ہوئے ہے۔
پیٹرولیم اور قدرتی گیس کی وزارت کے بیان کے مطابق، کل آن لائن گھریلو ایل پی جی سلنڈر کی بکنگ بڑھ کر 99 فیصد ہو گئی، جبکہ او ٹی پی پر مبنی ڈیلیوری 94 فیصد سے زیادہ رہی۔ وزارت نے بتایا کہ مارچ 2026 سے اب تک تقریباً 5.96 لاکھ پی این جی گیس کنکشن فراہم کیے جا چکے ہیں اور 2.68 لاکھ اضافی کنکشنز کے لیے بنیادی ڈھانچہ تیار کیا گیا ہے۔ اس کے علاوہ تقریباً 6.66 لاکھ صارفین نے نئے کنکشنز کے لیے رجسٹریشن کرایا ہے۔
وزارت کے مطابق، 9 اپریل 2026 سے ممبئی، کوچی، ویزاگ، چنئی، متھرا اور گجرات کی ریفائنریوں نے کیمیکل، فارما اور پینٹ صنعت کو 10,000 میٹرک ٹن سے زیادہ پروپیلین اور 1200 میٹرک ٹن سے زیادہ بیوٹائل ایکریلیٹ فراہم کیا ہے۔ اب تک 2,922 سے زیادہ بھارتی ملاحوں کی محفوظ وطن واپسی ہو چکی ہے، جن میں گزشتہ 24 گھنٹوں میں خلیجی خطے کے مختلف مقامات سے واپس آنے والے 30 ملاح بھی شامل ہیں۔
وزارت نے کہا کہ مغربی ایشیا کی بدلتی صورتحال کے پیش نظر پیٹرولیم مصنوعات اور ایل پی جی کی بلا رکاوٹ دستیابی کو یقینی بنانے کے لیے مختلف اقدامات کیے جا رہے ہیں۔ شہریوں کو مشورہ دیا گیا ہے کہ وہ گھبراہٹ میں پیٹرول، ڈیزل اور ایل پی جی کی خریداری سے گریز کریں، کیونکہ حکومت ان کی مسلسل فراہمی کے لیے ہر ممکن کوشش کر رہی ہے۔
وزارت نے عوام کو خبردار کیا کہ افواہوں سے بچیں اور درست معلومات کے لیے سرکاری ذرائع پر ہی اعتماد کریں۔ ایل پی جی صارفین سے اپیل کی گئی ہے کہ وہ ڈیجیٹل بکنگ پلیٹ فارمز کا استعمال کریں اور ڈسٹری بیوٹرز کے پاس جانے سے گریز کریں۔ شہریوں کو متبادل ایندھن جیسے پی این جی، الیکٹرک یا انڈکشن کک ٹاپ کے استعمال کی بھی ترغیب دی گئی ہے۔
پیٹرولیم وزارت نے واضح کیا کہ موجودہ صورتحال کے باوجود گھریلو ایل پی جی، پی این جی اور سی این جی کی 100 فیصد سپلائی برقرار رکھی گئی ہے۔ کمرشل ایل پی جی کی فراہمی میں اسپتالوں اور تعلیمی اداروں کو ترجیح دی جا رہی ہے، جبکہ فارما، اسٹیل، آٹو موبائل، بیج اور زرعی شعبوں کو بھی ترجیحی بنیادوں پر سپلائی دی جا رہی ہے۔
وزارت کے مطابق، مہاجر مزدوروں کے لیے 5 کلوگرام ایف ٹی ایل کی سپلائی 2 اور 3 مارچ 2026 کو اوسط یومیہ سپلائی کے مقابلے میں دوگنی کر دی گئی ہے۔ حکومت نے سپلائی اور طلب دونوں پہلوؤں پر متعدد اقدامات نافذ کیے ہیں، جن میں ریفائنری کی پیداواری صلاحیت میں اضافہ، شہری علاقوں میں بکنگ کے وقفے کو 21 سے بڑھا کر 25 دن اور دیہی علاقوں میں 45 دن تک کرنا، اور سپلائی کے لیے علاقوں کو ترجیح دینا شامل ہے۔
شہریوں سے یہ اپیل بھی کی گئی ہے کہ وہ موجودہ صورتحال کے پیش نظر اپنی روزمرہ زندگی میں توانائی کے تحفظ کے لیے ضروری اقدامات کریں۔
ہندوستھان سماچار
---------------
ہندوستان سماچار / عبدالواحد
