جموں, یکم مئی (ہ س)۔ شیو سینا کی جموں و کشمیر یونٹ نے پی ڈی پی رہنما التجا مفتی کے خلاف سائبر پولیس کی جانب سے درج ایف آئی آر کی حمایت کرتے ہوئے سافٹ دہشت گردی اور ڈیجیٹل پروپیگنڈے کے خلاف سخت، غیر جانبدار اور وقت بند کارروائی کا مطالبہ کیا ہے۔پارٹی کے صدر منیش ساہنی نے یہاں ایک پریس کانفرنس سے خطاب کرتے ہوئے کہا کہ بھارت کی خودمختاری اور سالمیت کو نقصان پہنچانے والی کسی بھی سرگرمی یا بیان کو اظہارِ رائے کی آزادی کے نام پر جائز قرار نہیں دیا جا سکتا۔ انہوں نے کہا کہ علیحدگی پسند عناصر کی کسی بھی شکل میں تعریف یا تائید ایک سنجیدہ معاملہ ہے اور اگر یہ کسی منظم ڈیجیٹل مہم کا حصہ ہو تو اس کی مکمل تحقیقات ہونی چاہیے۔
انہوں نے مزید کہا کہ اس طرح کے بیانات ماضی میں بھی تنازع کا باعث بن چکے ہیں اور حساس معاملات پر بار بار اظہارِ خیال معاشرے میں انتشار اور ابہام پیدا کرتا ہے۔ ساہنی نے کہا کہ اختلاف رائے جمہوری حق ہے، لیکن ملک مخالف بیانیے کو فروغ دینا ناقابل قبول ہے۔انہوں نے انتظامیہ سے اپیل کی کہ تحقیقات صرف ایف آئی آر تک محدود نہ رکھی جائیں بلکہ اس کے پیچھے موجود ڈیجیٹل نیٹ ورک اور ممکنہ روابط کو بھی کھنگالا جائے۔
انہوں نے کہا کہ جموں و کشمیر بھارت کا اٹوٹ انگ ہے اور رہے گا، اور علیحدگی پسندی—چاہے بندوق کے ذریعے ہو یا سوشل میڈیا کے ذریعے اس سے سختی سے نمٹا جانا چاہیے۔
ہندوستھان سماچار
---------------
ہندوستان سماچار / محمد اصغر
