جموں, یکم مئی (ہ س)۔
جموں و کشمیر کے وزیر اعلیٰ عمر عبداللہ نے کہا ہے کہ اگر ایس آئی آر کا اثر مغربی بنگال اسمبلی انتخابات کے نتائج پر پڑتا ہے تو یہ ایک خطرناک مثال قائم کرے گا، جس کے خلاف تمام سیاسی جماعتوں کو محتاط رہنے کی ضرورت ہے۔
صحافیوں سے گفتگو کرتے ہوئے انہوں نے کولکاتہ کے بھوانی پور علاقے میں اسٹرانگ روم کے باہر پیش آنے والے واقعہ پر ردعمل دیتے ہوئے کہا کہ مغربی بنگال کی وزیر اعلیٰ ممتا بنرجی کو ای وی ایمز کی حفاظت کے لیے لوگوں کو تعینات کرنے کا مکمل حق حاصل ہے۔ انہوں نے کہا کہ ماضی میں بھی بیلٹ باکس کے دور میں سیاسی جماعتیں اسٹرانگ روم کے باہر اپنے نمائندے تعینات کرتی تھیں۔
وزیر اعلیٰ نے واضح کیا کہ ووٹوں میں مبینہ خردبرد ای وی ایمز کے ذریعے نہیں بلکہ اسپیشل انٹینسیو ریویژن کے عمل کے ذریعے ہو رہی ہے۔ انہوں نے کہا کہ ووٹر فہرستوں میں تبدیلی کے ذریعے انتخابی عمل کو متاثر کرنے کی کوشش کی جا رہی ہے۔
انہوں نے مزید کہا کہ مغربی بنگال اسمبلی انتخابات اپوزیشن کے لیے ایک بڑا امتحان ہیں اور اگر ایس آئی آر کے اثرات نتائج میں ظاہر ہوئے تو اس کے سنگین نتائج برآمد ہو سکتے ہیں۔ انہوں نے زور دیا کہ ووٹر لسٹ سے نام حذف کرنے جیسی کوششوں کے خلاف سیاسی جماعتوں کو متحد ہو کر چوکنا رہنا ہوگا۔
ایگزٹ پولز پر تبصرہ کرتے ہوئے عمر عبداللہ نے کہا کہ ماضی کی طرح اس بار بھی یہ غلط ثابت ہوں گے۔ انہوں نے کہا کہ پانچ سال قبل بھی ایگزٹ پولز نے بی جے پی کی جیت کی پیش گوئی کی تھی، لیکن نتائج اس کے برعکس آئے تھے۔ انہوں نے مزید کہا کہ پیر کو نتائج سامنے آنے کے بعد اصل صورتحال واضح ہو جائے گی۔
ہندوستھان سماچار
---------------
ہندوستان سماچار / محمد اصغر
