نئی دہلی، 3 اپریل (ہ س)۔ بیرونی شمالی ضلع پولیس نے بوانا علاقے میں ایل پی جی سلنڈروں کو غیر قانونی طور پر ذخیرہ کرنے اور بلیک مارکیٹنگ کرنے والے ایک بڑے ریکیٹ کا پردہ فاش کیا ہے۔ اس کارروائی میں پولیس نے ایک ملزم کو گرفتار کر کے 75 گیس سلنڈر برآمد کر لیے۔بیرونی شمالی ضلع کے ڈپٹی کمشنر آف پولیس ہریشور سوامی نے جمعہ کو بتایا کہ 2 اپریل کو پولیس کو اطلاع ملی کہ بوانا کے ڈی ایس آئی آئی ڈی سی سیکٹر-2 علاقے میں گیس سلنڈروں کو غیر قانونی طور پر ذخیرہ اور منتقل کیا جا رہا ہے۔ اطلاع کی بنیاد پر پولیس کی ایک ٹیم نے ڈسٹرکٹ پارک کے قریب پکیٹ قائم کر کے نگرانی شروع کر دی۔ شام 4 بجے کے قریب، ایک ٹاٹا ایس گاڑی کو روک کر تلاشی لی گئی، جس میں 27 ایل پی جی سلنڈر برآمد ہوئے۔

ڈرائیور کی شناخت اوچنڈی گاو¿ں کے رہنے والے انیل (50) کے طور پر ہوئی ہے۔ پوچھ گچھ کے دوران، وہ سلنڈروں سے متعلق کوئی درست دستاویزات پیش کرنے سے قاصر تھا۔ سخت پوچھ گچھ پر ملزم نے انکشاف کیا کہ اس نے قریبی کمروں میں مزید سلنڈر چھپا رکھے تھے۔ اس کے بعد پولیس نے اس کے مقام پر چھاپہ مارا اور مختلف کمروں اور ایک لوہے کے شیڈ سے 48 اضافی سلنڈر برآمد کئے۔ اس سے مجموعی ضبطی کی تعداد 75 ہوگئی۔

ڈپٹی کمشنر آف پولیس کے مطابق برآمد ہونے والے سلنڈروں میں گھریلو اور کمرشل دونوں طرح کے سلنڈر شامل ہیں جن میں سے کئی بھرے ہوئے تھے۔ پولیس کے مطابق ان سلنڈروں کو بغیر کسی حفاظتی اقدام کے ذخیرہ کیا گیا تھا جس سے آس پاس کے علاقے کو بڑا خطرہ لاحق تھا۔ایک پولیس افسر نے بتایا کہ ملزم سلنڈروں کی غیر قانونی ذخیرہ اندوزی اور بلیک مارکیٹنگ میں ملوث تھا۔ ضروری اشیاءایکٹ اور دیگر دفعات کے تحت مقدمہ درج کر کے ملزم کو گرفتار کر لیا گیا ہے۔ پولیس اب پورے نیٹ ورک کی تفتیش کر رہی ہے، بشمول سپلائی چین، خریدار اور دیگر ساتھی۔

ہندوستان سماچار

ہندوستان سماچار / Mohammad Khan