تہران، 25 اپریل (ہ س)۔ ایران نے واضح کیا ہے کہ وزیرِ خارجہ عباس عراقچی کے دورہ اسلام آباد کے دوران امریکہ کے ساتھ بات چیت کا فی الحال کوئی ارادہ نہیں ہے۔ عراقچی کی قیادت میں ایران کا وفد اسلام آباد پہنچا ہے۔ ایران نے کہا ہے کہ اس دورے کے دوران ایران-امریکہ کے درمیان کوئی براہِ راست میٹنگ طے نہیں ہے۔

خاص بات یہ ہے کہ امریکہ نے کہا ہے کہ امریکہ کے خصوصی ایلچی اسٹیو وٹکوف اور وائٹ ہاوس کے مشیر جیرڈ کشنر ہفتہ کو ایران کے ساتھ بات چیت کے لیے اسلام آباد جائیں گے۔

ایران کے وزیرِ خارجہ عباس عراقچی کی قیادت میں جمعہ کی رات ایران کا وفد پاکستانی رہنماوں سے بات چیت کے لیے اسلام آباد پہنچا ہے۔ ایران انٹرنیشنل نے پارلیمنٹ کی قومی سلامتی اور خارجہ پالیسی کمیٹی کے سربراہ ابراہیم عزیزی کے حوالے سے بتایا ہے کہ وزیرِ خارجہ عباس عراقچی کا دورہ پاکستان صرف دو طرفہ مسائل تک محدود ہے اور اس کا ایٹمی مذاکرات سے کوئی تعلق نہیں ہے۔ عزیزی نے سوشل میڈیا پوسٹ میں لکھا، ’’تہران میں غیر ملکی صحافیوں سے ملاقات کی اور انہیں ہمارے ملک کی صحیح تصویر پیش کرنے کے لیے آنے پر شکریہ ادا کیا۔ میٹنگ میں میں نے واضح کر دیا کہ وزیرِ خارجہ عراقچی کا دورہ پاکستان صرف دو طرفہ تعلقات پر تبادلہ خیال کے لیے ہے اور انہیں ایٹمی مذاکرات سے متعلق کوئی کام نہیں سونپا گیا ہے، جو ایران کی اہم حدود میں سے ایک ہے۔‘‘

پاکستانی میڈیا رپورٹ کے مطابق، ایرانی وزیرِ خارجہ جمعہ کی دیر رات اسلام آباد پہنچے۔

پاکستان کے وزیرِ خارجہ اسحاق ڈار نے ایکس پر ان کے پہنچنے کی اطلاع دی۔ ایرانی وزارتِ خارجہ کے ترجمان اسماعیل بقائی بھی وفد کے ساتھ ہیں۔ تاہم امریکہ کا کہنا ہے کہ تہران کی جانب سے ٹرمپ انتظامیہ سے رابطہ کرنے کے بعد امریکی خصوصی ایلچی اسٹیو وٹکوف اور وائٹ ہاوس کے مشیر جیرڈ کشنر ہفتہ کو ایران کے ساتھ بات چیت کے لیے اسلام آباد جائیں گے۔ وائٹ ہاوس کی پریس سکریٹری کیرولین لیوٹ نے اپنے بیان میں کہا کہ ایران نے آمنے سامنے کی بات چیت کی درخواست کی ہے۔

ہندوستھان سماچار

---------------

ہندوستان سماچار / انظر حسن