کولکاتا، 19 اپریل (ہ س): کولکاتا نائٹ رائیڈرز (کے کے آر) نے انڈین پریمیئر لیگ (آئی پی ایل) 2026 میں اپنی پہلی جیت درج کی۔ اتوار کو کولکاتا کے ایڈن گارڈنز میں کھیلے گئے میچ میں کے کے آر نے راجستھان رائلز (آر آر) کو 4 وکٹوں سے شکست دی۔
راجستھان نے پہلے بلے بازی کرتے ہوئے 20 اوور میں نو وکٹ پر 155 رن بنائے۔ جواب میں کولکاتا نے رنکو سنگھ کی 34 گیندوں پر 53 رن کی ناقابل شکست نصف سنچری اور انوکول رائے کی 16 گیندوں پر ناقابل شکست 29 رن کی بدولت 19.4 اوور میں چھ وکٹ پر 161 رن بنا کر میچ جیت لیا۔
کولکاتا اس سیزن میں اب تک سات میچ کھیل چکا ہے۔ ٹیم ان میں سے پانچ ہار چکی ہے جبکہ ایک میچ بارش کی وجہ سے منسوخ ہو گیا تھا۔ ٹیم پوائنٹس ٹیبل میں تین پوائنٹس کے ساتھ نویں نمبر پر ہے۔ چھ میچوں میں یہ راجستھان کی دوسری شکست ہے۔ ٹیم نے چار میچ جیتے ہیں اور اس کے آٹھ پوائنٹس ہیں۔ راجستھان پوائنٹس ٹیبل میں تیسرے نمبر پر ہے۔
156 کے ہدف کے تعاقب میں کے کے آر کی شروعات خراب رہی۔ انہوں نے پانچ رن کے اندر دو وکٹیں گنوائیں۔ کپتان اجنکیا رہانے اور ٹم سیفرٹ بغیر کوئی رن بنائے آو¿ٹ ہوگئے۔ پچھلے میچ میں نصف سنچری بنانے والے کیمرون گرین بھی بڑی اننگز کھیلنے میں ناکام رہے، وہ 27 رن بنا کر آو¿ٹ ہوئے۔بعد ازاں انگکرش راگھونشی (10)، روومن پاول (23)، اور رمندیپ سنگھ (10) کو آو¿ٹ کیا۔ ٹیم نے 85 رن پر چھ وکٹیں گنوا دیں۔ اس کے بعد، رنکو سنگھ اور انکول رائے نے اننگز کو مستحکم کیا۔ دونوں بلے بازوں نے شاندار بلے بازی کی۔ انہوں نے ساتویں وکٹ کے لیے ناقابل شکست 76 رن کی شراکت داری کرتے ہوئے ٹیم کو سیزن کی پہلی جیت دلائی۔ رنکو نے 34 گیندوں پر پانچ چوکوں اور دو چھکوں کی مدد سے ناقابل شکست 53 رن بنائے جبکہ انوکول نے 16 گیندوں پر ایک چوکے اور دو چھکوں کی مدد سے ناقابل شکست 29 رن بنائے۔
راجستھان کی جانب سے رویندرا جڈیجا نے 2 جبکہ جوفرا آرچر، ناندرے برگر، روی بشنوئی اور یشراج پنجا نے ایک ایک وکٹ حاصل کی۔
راجستھان رائلز نے پہلے بلے بازی کرتے ہوئے 20 اوورز میں نو وکٹ پر 155 رن بنائے۔ اوپنر یشسوی جیسوال اور ویبھو سوریاونشی نے راجستھان کو شاندار آغاز فراہم کیا۔ ویبھو نے 28 گیندوں میں چھ چوکوں اور دو چھکوں کی مدد سے 46 رن بنائے جبکہ یشسوی نے 29 گیندوں میں چار چوکوں اور دو چھکوں کی مدد سے 39 رن بنائے۔ ان دو وکٹوں کے گرنے کے بعد راجستھان کی اننگز ڈگمگا گئی۔ ٹیم کا کوئی اور بلے باز شاندار بلے بازی کا مظاہرہ نہ کر سکا۔ شمرون ہیٹمائر نے 15 رن، کپتان ریان پیراگ 12 رن، رویندرا جڈیجہ 09 رن، جوفرا آرچر 08 رن اور ڈونووین فریرا 07 رن کا حصہ بنا۔
کولکاتا کی جانب سے کارتک تیاگی اور ورون چکرورتی نے تین تین جبکہ سنیل نارائن نے دو وکٹیں حاصل کیں۔
---------------
ہندوستان سماچار / عبدالسلام صدیقی
