خواتین پر مظالم کے معاملات کی گہرائی سے تحقیقات کی ہدایت۔ فڑنویس کا متاثرہ خواتین کا اعتماد بحال کرنے پر زور

ممبئی ، 18 اپریل (ہ س)۔ مہاراشٹر کے وزیر اعلیٰ دیویندر فڑنویس نے ہفتہ کے روز محکمہ داخلہ کے افسران کو خواتین پر ہونے والے مظالم کے معاملات کی گہرائی سے تحقیقات کرنے اور مضبوط شواہد جمع کرنے کی ہدایت دی ہے۔ ساتھ ہی انہوں نے متاثرہ خواتین میں حکومت اور پولیس کے تئیں اعتماد بحال کرنے کی ضرورت پر بھی زور دیا ہے۔ یہ معلومات وزیر اعلیٰ سیکریٹریٹ کی جانب سے دی گئی۔

وزیر اعلیٰ سکریٹریٹ کے مطابق دیویندر فڑنویس نے آج منترالیہ میں محکمہ داخلہ کے اعلیٰ افسران کی ایک اہم میٹنگ طلب کی، جس میں ناشک تبدیلی مذہب معاملہ، اشوک خرات کیس، امراوتی کے فحش ویڈیوز سے متعلق معاملہ سمیت کئی حساس تحقیقات کی پیش رفت کا جائزہ لیا گیا۔ اس میٹنگ میں پولیس کے ڈائریکٹر جنرل، ایڈیشنل چیف سیکریٹری (داخلہ)، ایس آئی ٹی سربراہ اور دیگر سینئر پولیس افسران موجود تھے۔

میٹنگ کے دوران وزیر اعلیٰ نے کہا کہ ریاست میں اس وقت خواتین کے خلاف مظالم کے متعدد معاملات کی تحقیقات جاری ہیں، جن میں متاثرین کا اعتماد جیتنا انتہائی ضروری ہے۔ انہوں نے واضح ہدایت دی کہ جو بھی قصوروار پایا جائے، اسے سخت سے سخت سزا دی جائے۔ انہوں نے مضبوط استغاثہ تیار کرنے کی اہمیت پر زور دیتے ہوئے افسران کو ہدایت دی کہ ٹھوس اور قابلِ اعتماد شواہد جمع کیے جائیں تاکہ عدالت میں مقدمہ مضبوطی سے قائم رہ سکے۔ انہوں نے کہا کہ حتمی اور فیصلہ کن ثبوتوں کے ذریعے جرم کو ثابت کرنا اولین ترجیح ہونی چاہیے۔

وزیر اعلیٰ نے یہ بھی واضح کیا کہ مذہبی تبدیلی سے جڑے معاملات کو کسی بھی صورت برداشت نہیں کیا جائے گا۔ ناشک پولیس کی جانب سے اس معاملے کا انکشاف کرنے پر انہوں نے سراہنا کرتے ہوئے ہدایت دی کہ تحقیقات کو اسی سنجیدگی اور سختی کے ساتھ آگے بڑھایا جائے اور تمام ممکنہ پہلوؤں اور طریقہ کار کا باریک بینی سے جائزہ لیا جائے تاکہ مکمل تحقیقات کو یقینی بنایا جا سکے۔

امراوتی ضلع کے پرتواڑا معاملے میں انہوں نے افسران کو ہدایت دی کہ متاثرین کا اعتماد بحال کرنے کے لیے کونسلنگ کے ذریعے انہیں آگے آکر شکایات درج کرانے کی ترغیب دی جائے۔ اس کے ساتھ ہی انہوں نے سماجی کارکنوں کو شامل کرنے کی بھی تجویز دی تاکہ متاثرین کی مدد کی جا سکے اور شکایت درج کرنے کا عمل آسان بنایا جا سکے۔

گورےگاؤں منشیات معاملے پر بات کرتے ہوئے وزیر اعلیٰ نے منشیات سے متعلق جرائم کے خلاف سخت کارروائی کرنے کا حکم دیا اور کہا کہ یہ مسئلہ براہِ راست نوجوانوں کے مستقبل سے جڑا ہوا ہے، اس لیے اسے انتہائی سنجیدگی سے لیا جانا چاہیے اور نافذ کرنے والی ایجنسیاں مجرموں کے خلاف بڑے پیمانے پر ٹھوس کارروائی کریں۔

ہندوستھان سماچار--------------------

ہندوستان سماچار / جاوید این اے