امپھال، 18 اپریل (ہ س): امن و امان کی صورتحال کا جائزہ لینے اور عام لوگوں کو ہونے والی تکلیف کو مدنظر رکھتے ہوئے، منی پور حکومت نے پانچ اضلاع – امپھال ویسٹ، امپھال ایسٹ، تھوبل، کاکچنگ اور بشنو پور میں تمام موبائل اور انٹرنیٹ خدمات پر سے عارضی پابندی ہٹا دی ہے۔
قابل ذکر ہے کہ موبائل ڈیٹا سروسز، براڈ بینڈ، وی ایس اے ٹی، اور وی پی این خدمات کو ابتدائی طور پر 7 اپریل کو ان اضلاع میں امن و امان کی صورتحال میں بگاڑ کے بعد تین دن کے لیے معطل کر دیا گیا تھا۔ اس پابندی کو بعد میں وقتاً فوقتاً بڑھا دیا گیا، حالانکہ کچھ براڈ بینڈ سروسز، جیسے آئی ایل ایل اور ایف ٹی ٹی ایچ کے لیے محدود اور کنٹرول شدہ چھوٹ دی گئی تھی۔
ریاستی انتظامیہ کے مطابق، یہ فیصلہ زمینی صورتحال کا جائزہ لینے اور انٹرنیٹ کی بندش کی وجہ سے بڑے پیمانے پر ہونے والی رکاوٹوں پر غور کرنے کے بعد لیا گیا، جس سے ہائی کورٹ، ضلعی عدالتوں، صحت کی دیکھ بھال کی خدمات، تعلیمی اداروں اور ڈیجیٹل پلیٹ فارم پر منحصر مختلف محکموں کا کام متاثر ہوا تھا۔
اس کے علاوہ گھر سے کام، مالیاتی اور ٹیکس خدمات، بجلی سے متعلق خدمات، موبائل ریچارج اور ایل پی جی بکنگ جیسی ضروری خدمات بھی متاثر ہوئیں۔
گورنر نے یہ حکم عوامی مفاد میں ٹیلی کمیونیکیشن سروسز رولز 2024 کی عارضی معطلی کے سیکشن 3 کے تحت جاری کیا ہے۔ یہ ہدایت ہنگامی صورتحال کے پیش نظر یکطرفہ طور پر نافذ کی گئی ہے اور اس بارے میں پرنٹ اور الیکٹرانک میڈیا کے ذریعے معلومات فراہم کی جا رہی ہیں۔
ریاستی حکومت نے شہریوں سے انٹرنیٹ اور سوشل میڈیا کو ذمہ داری سے استعمال کرنے کی اپیل کی ہے اور خبردار کیا ہے کہ کسی بھی قسم کا غلط استعمال مستقبل میں پابندی کا باعث بن سکتا ہے۔
---------------
ہندوستان سماچار / عبدالسلام صدیقی
