گورکھپور، 16 اپریل (ہ س)۔ وزیر اعلی یوگی آدتیہ ناتھ نے کہا کہ سال 2017 کے بعد پولیس محکمہ میںوقت پر بھرتی، تربیت اور بنیادی سہولیات کی ترقی نے پولیس اہلکاروں کے کام کی رفتار میں اضافہ کیا ہے۔ اس کے نتیجے میں ریاست میں سکیورٹی کا بہتر ماحول اور اچھی حکمرانی کا ماڈل قائم ہوا ہے۔ انہوں نے بتایا کہ گزشتہ نو برسوں میں 2لاکھ 19ہزار سے زائد پولیس اہلکاروں کی بھرتی کا عمل مکمل کیا گیا ہے۔

وزیر اعلیٰ یوگی جمعرات کی صبح گورکھ ناتھ مندر کے علاقے کی سکیورٹی کے لیے تعمیر کی گئی دو جدید سکیورٹی کی عمارتوں کی افتتاحی تقریب سے خطاب کر رہے تھے۔ ان عمارتوں میں مندر کی حفاظت سے وابستہ ایڈیشنل سپرنٹنڈنٹ آف پولیس ، ڈپٹی سپرنٹنڈنٹ آف پولیس کے دفاتر، کنٹرول روم، پولیس اسٹور روم اور مینٹیننس ورکشاپ تعمیر کئے گئے ہیں۔ ان کی تعمیر پر 9.18 کروڑ روپے سے زیادہ لاگت آئی ہے۔ سکیورٹی بلڈنگ کا افتتاح کرنے کے بعد وزیر اعلیٰ نے دورہ کیا اور عمارت میں دستیاب سہولیات کا معائنہ کیا۔

اس موقع پر اجتماع سے خطاب کرتے ہوئے وزیر اعلیٰ نے کہا کہ سکیورٹی ، اچھی حکمرانی کی پہلی شرط ہوتی ہے۔ ہر شخص کو سکیورٹی چاہیے۔ اس کے لیے حکومتی سطح پر کوششیں جاری ہیں۔ تاہم، ہم اس کا صرف ایک پہلو ہی دیکھ پاتے ہ تھے۔ پولیس عام سپاہی ہویا سب انسپکٹر ہو ،یا ڈپٹی سپرنٹنڈنٹ، اگر ان کی تربیت نہیں ہے تو وہ بھی ایک عام آدمی ہی ہوگا۔ یوگی نے کہا کہ پہلے بھرتی، تربیت اور انفراسٹرکچر پر توجہ نہیں دی جاتی تھی۔ اس کے نتیجے میں بہت سے نوجوان پولیس فورس میں شامل ہونا نہیں چاہتے تھے۔

نوبرسوں میں دو لاکھ 19ہزار سے زیادہ پولیس اہلکاروں کی بھرتی

وزیر اعلیٰ نے 2017 سے محکمہ پولیس میں ہونے والی تبدیلیوں پر بات کرتے ہوئےکہا کہ نو سال قبل جب ان کی حکومت آئی تو پولیس فورس میں نصف سے زیادہ اسامیاں خالی تھیں۔ انہوں نے بتایا کہ گزشتہ نو برسوں میں دو لاکھ 19ہزار سے زائد پولیس اہلکاروں کی بھرتی کا عمل مکمل کیا جا چکا ہے۔ انہوں نے مزید کہا کہ 2017 میں پولیس کی تربیت کی گنجائش ایک وقت میں تین ہزار سے زیادہ نہیں تھی۔ اس وقت بنیادی ڈھانچے کی سہولیات کی ترقی کے نتیجے میں ایک وقت میں 60 ہزار پولیس اہلکاروں کو تربیت دی جاتی ہے۔ بروقت فیصلوں اور وسائل کی بروقت فراہمی کے نتیجے میں پولیس کو 200 گنا زیادہ سہولیات سے آراستہ کیا گیا ہے۔

وزیر اعلیٰ یوگی آدتیہ ناتھ نے کہا کہ پہلے پولیس اسٹیشن کی عمارتیں بنائی گئی تھیں لیکن ان میں بیرکیں نہیں بنائی گئیں۔ وہاں دیگر سہولیات میسر نہیں تھیں۔ کئی بار جب پولیس کسی ملزم کو گرفتار کرتی تھی تو اس کے رکنے کا کوئی انتظام نہیں ہوتا تھا۔ پولیس اکثر بے بس نظر آتی تھی۔ ملزم بھاگ جائے گا۔ انہوں نے کہا کہ پولیس کو اب بے بس ہونے کی ضرورت نہیں۔ اب ملزم بچ نہیں سکتا کیونکہ اسے تھانے میں ہی رکھنے کی سہولتیں فراہم کر دی گئی ہیں۔

اس موقع پر نمایاں طور پر میئر ڈاکٹر منگلیش شریواستو، ایم ایل سی اور بی جے پی کے ریاستی نائب صدر ڈاکٹر دھرمیندر سنگھ، ایم ایل اے وپن سنگھ، مہندرپال سنگھ، پردیپ شکلا، سرون نشاد، ریاستی حکومت کے مشیر اونیش اوستھی، اے ڈی جی گورکھپور زون متھا اشوک جین، اے ڈی جی سکیورٹی ترون گابا، بی جے پی کے ضلع صدر جناردن تیواری، شہر کے کوآرڈینیٹر راجیش گپتاموجود تھے۔

ہندوستھان سماچار

ہندوستان سماچار / محمد شہزاد