وزیراعلیٰ ڈاکٹر یادو نے ریاست میں مردم شماری 2027 کے عمل کا آن لائن افتتاح کیا

ریاست میں 16 سے 30 اپریل تک خود شماری (سیلف اینومریشن) کا کام ہوگا

بھوپال، 16 اپریل (ہ س)۔ مدھیہ پردیش کے وزیراعلیٰ ڈاکٹر موہن یادو نے کہا ہے کہ 16 اپریل سے ریاست میں مردم شماری کا آغاز ہو رہا ہے۔ یہ صرف اعداد و شمار کا عمل نہیں بلکہ ہماری قوم کے مستقبل کو صحیح سمت دینے کا اہم قدم ہے۔ مردم شماری ملک کی ریڑھ کی ہڈی ہے، یہ ترقی کی بنیاد ہے۔

یہ بات وزیراعلیٰ ڈاکٹر یادو نے جمعرات کے روز ریاست میں مردم شماری 2027 کے عمل کے آغاز کے موقع پر وزیراعلیٰ کی رہائش گاہ واقع ’سمتو بھون‘ میں منعقدہ پروگرام میں کہی۔ وزیراعلیٰ ڈاکٹر یادو نے خود شماری پورٹل se.census.gov.in پر ابتدائی رجسٹریشن کر کے ریاست میں خود شماری کے عمل کا آغاز کیا۔ انہوں نے کہا کہ اس بار کی مردم شماری ڈیجیٹل اور جدید ٹیکنالوجی کے ساتھ ہو رہی ہے۔ ریاست کے عوام کو اس میں مکمل دیانتداری اور سچائی کے ساتھ حصہ لینا چاہیے۔ یہ مردم شماری ہمارے بچوں کے روشن مستقبل کے لیے ہے۔ ریاست میں 16 سے 30 اپریل تک آن لائن خود شماری کا کام ہوگا۔ یکم سے 30 مئی تک مکانات کی فہرست سازی (ہاوس لسٹنگ) ہوگی۔ یہ عمل ڈیجیٹل طور پر انجام دیا جائے گا۔

وزیراعلیٰ ڈاکٹر یادو نے کہا کہ مردم شماری محض اعداد و شمار کا عمل نہیں بلکہ قوم کے مستقبل کو صحیح سمت دینے کا اہم قدم ہے۔ اس عمل کے ذریعے ہم یہ معلوم کر سکیں گے کہ ترقی کے ثمرات معاشرے کے سب سے دور کھڑے آخری فرد تک آسانی کے ساتھ پہنچ رہے ہیں یا نہیں۔ یہ مردم شماری ہماری اگلی نسل کے روشن مستقبل کے لیے ہے۔ ہر شہری کا فرض ہے کہ وہ مردم شماری میں صحیح، درست اور مکمل معلومات فراہم کرے۔ مردم شماری میں مصروف ملازمین اور افسران قوم کی تعمیر کا مقدس کام کر رہے ہیں۔ ان کی محنت اور درستگی سے کیا گیا کام ملک کے مستقبل کو مضبوط بنائے گا۔

اس موقع پر ایڈیشنل چیف سکریٹری انوپم راجن، کلکٹر بھوپال پریانک مشرا، کمشنر بھوپال میونسپل کارپوریشن محترمہ سنسکرتی جین، مردم شماری ڈائریکٹوریٹ کے ڈپٹی رجسٹرار جنرل ڈاکٹر وجے کمار سمیت ضلع انتظامیہ اور مردم شماری ڈائریکٹوریٹ کے افسران موجود تھے۔

ہندوستھان سماچار

---------------

ہندوستان سماچار / انظر حسن