ممبئی ، 30 مارچ (ہ س)۔ دادَر کے شیوتیرتھ میں راج ٹھاکرے اور پرتھ پوار کے درمیان ہونے والی ملاقات کے باعث مہاراشٹر کی سیاست میں نئی بحث شروع ہوئی ہے، اور اس ملاقات کے مقاصد اور ممکنہ نتائج پر مختلف آراء سامنے آ رہی ہیں۔ پرتھ پوار اس ملاقات کے لیے اچانک پہنچے اور تقریباً ڈیڑھ گھنٹہ قیام کے بعد بغیر کسی تبصرے کے واپس لوٹ گئے، جس کے باعث اس ملاقات کے حوالے سے قیاس آرائیاں مزید بڑھ گئی ہیں۔چند روز قبل روہت پوار نے بھی راج ٹھاکرے سے ملاقات کی تھی، جس میں اجیت پوار کے طیارہ حادثے سے متعلق گفتگو ہوئی تھی، اور بعد میں راج ٹھاکرے نے اس معاملے پر سوالات اٹھاتے ہوئے ایف آئی آر درج نہ ہونے کو مشتبہ قرار دیا تھا۔موجودہ حالات میں پرتھ پوار کی یہ ملاقات اہم سمجھی جا رہی ہے، خاص طور پر اس لیے کہ 2 اپریل کو راجیہ سبھا کی سات نشستیں خالی ہو رہی ہیں اور ان میں سے ایک کے لیے پرتھ پوار کو موقع دیا گیا ہے، جہاں ان کے بلا مقابلہ منتخب ہونے کا امکان ظاہر کیا جا رہا ہے۔اسی دوران نیشنلسٹ کانگریس پارٹی میں اجیت پوار کے طیارہ حادثے کے بعد کئی سیاسی تبدیلیاں دیکھنے میں آئی ہیں اور پرتھ پوار کی سرگرمیاں بھی بڑھی ہیں، جبکہ راج ٹھاکرے نے اس معاملے پر غیر جانبدارانہ تحقیقات کا مطالبہ کیا تھا۔عیاں رہے کہ پیوش گوئل کے اس بیان پر کہ این سی پی کی قیادت پرفل پٹیل کے پاس گئی ہے، راج ٹھاکرے نے ردعمل دیتے ہوئے مراٹھی قیادت کی بات کی تھی، جس کے بعد سنیترا پوار کو قومی صدر منتخب کیا گیا۔ ان تمام پہلوؤں کے تناظر میں یہ ملاقات ایک اہم سیاسی اشارہ سمجھی جا رہی ہے، جس کے اثرات مستقبل میں ظاہر ہونے کی توقع کی جا رہی ہے۔

ہندوستھان سماچار

--------------------

ہندوستان سماچار / جاوید این اے