گوہاٹی، 30 مارچ (ہ س)۔ بھارتیہ جنتا پارٹی (بی جے پی) کے پانچ لاکھ سے زیادہ کارکنوں نے پیر کو آسام میں وزیر اعظم نریندر مودی کے ’میرا بوتھ سب سے مضبوط‘ پروگرام میں حصہ لیا۔ ریاستی بی جے پی کی طرف سے جاری کردہ ایک بیان کے مطابق وزیر اعلیٰ ڈاکٹر ہیمنت بسوا سرما نے وزیر اعظم کے ورچوئل خطاب کو آسام کی ترقی کو مزید تیز کرنے کے لیے ایک’آشرواد‘ قرار دیا۔ دوپہر 1 بجے منعقد ہونے والے اس پروگرام نے ریاست بھر میں بوتھ اور شکتی کیندر کی سطح کے کارکنوں کو جوڑا، جس کا مقصد تنظیم کو نچلی سطح پر مزید مضبوط کرنا تھا۔

تقریب کے دوران وزیر اعظم نے آسام کے مختلف علاقوں سے منتخب پانچ کارکنوں سے بھی بات چیت کی اور مقامی مسائل پر تبادلہ خیال کیا۔ ریاستی بی جے پی صدر اور ایم پی دلیپ سائکیا نے کہا کہ اس اقدام سے مزید فعال کارکنوں کی حوصلہ افزائی ہوگی۔ انہوں نے کہا کہ بی جے پی کارکن صرف الیکشن جیتنے کے لیے نہیں بلکہ لوگوں کا اعتماد جیتنے کے لیے لگن سے کام کرتے ہیں۔ریاستی ترجمان رنجیب شرما کے مطابق 500,000 سے زیادہ کارکن وزیر اعظم کا خطاب سننے کے لیے ریاست کے 6,348 پاور سینٹرز میں سے 4,500 پر جمع ہوئے۔ گوہاٹی میں اٹل بہاری واجپائی بھون میں کارکنوں کے ساتھ اس تقریب میں مرکزی وزیر پاویترا مارگریتا نے بھی شرکت کی۔

دریں اثنا، بی جے پی کے قومی صدر نتن نوین اپنا دو روزہ دورہ آسام مکمل کرنے کے بعد پیر کو نئی دہلی روانہ ہو گئے۔ اپنے دورے کے دوران، انہوں نے موریگاو¿ں ضلع کے جاگیروڈ کے دیو شال میدان میں وجے سنکلپ یاترا کے حصے کے طور پر ایک زبردست انتخابی ریلی سے خطاب کیا۔ اس ریلی کا انعقاد پارٹی امیدوار اور وزیر پیوش ہزاریکا کی حمایت میں کیا گیا تھا اور ریاستی صدر دلیپ سائکیا بھی موجود تھے۔ تاہم، خراب موسمی حالات کی وجہ سے نوین، گولا گھاٹ ضلع کے بوکاکھٹ میں ایک اور انتخابی ریلی میں شرکت کرنے سے قاصر تھے۔

ہندوستھان سماچار

ہندوستان سماچار / Mohammad Khan