علی گڑھ، 30 مارچ (ہ س)۔ ضلع میں تعلیمی نظام کو زیادہ شفاف، کفایتی نانے کے لیے اہم اقدامات کیے جا رہے ہیں۔ اس سلسلے میں ضلع اسکول انسپکٹر ڈاکٹر پورن سنگھ نے ایڈیشنل ڈی آئی او ایس، پرنسپلز اور اسکول مینجمنٹ کو واضح ہدایات جاری کر دی ہیں کہ نجی اسکولوں میں نصابی اور معاون کتابوں کے انتخاب میں مقررہ اصولوں پر سختی سے عمل کیا جائے۔

ضلع مجسٹریٹ سنجیو رنجن نے کہا کہ تعلیم کے شعبے میں شفافیت اور معیار کو یقینی بنانا انتظامیہ کی اولین ترجیح ہے اور کسی بھی صورت میں والدین پر غیر ضروری مالی بوجھ نہیں ڈالنے دیا جائے گا۔ انہوں نے واضح کیا کہ تمام اسکولوں کو سرکاری ضوابط پر عمل کرنا ہوگا، بصورت دیگر سخت کارروائی کی جائے گی۔

انہوں نے یہ بھی ہدایت دی کہ طلبہ اور والدین کے استحصال کو کسی بھی صورت برداشت نہیں کیا جائے گا اور خلاف ورزی کرنے والے اسکولوں کے خلاف سخت ایکشن لیا جائے گا۔

ضلع مجسٹریٹ نے کہا کہ این سی ای آر ٹی اور سی بی ایس ای کے واضح رہنما اصولوں کے مطابق جماعت 1 سے 12 تک این سی ای آر ٹی کی کتابوں کو ہی بنیادی نصابی مواد کے طور پر اپنایا جانا چاہیے۔ اگر کسی بھی صورت میں والدین پر اضافی مالی بوجھ ڈالا جاتا ہے تو اسے قواعد کی خلاف ورزی تصور کیا جائے گا۔

انہوں نے خبردار کیا کہ کسی بھی اسکول کی جانب سے کمیشن پر مبنی کتابوں کی فروخت یا غیر شفاف مالی لین دین کو ہرگز برداشت نہیں کیا جائے گا۔ ایسے معاملات کی مکمل جانچ کے بعد سخت کارروائی کی جائے گی۔

ڈی آئی او ایس کو ہدایت دی گئی ہے کہ تمام نجی اور امداد یافتہ اسکولوں کا فوری معائنہ کیا جائے اور یہ یقینی بنایا جائے کہ این سی ای آر ٹی کی کتابوں کو ترجیح دی جا رہی ہے۔ کسی بھی طالب علم کو نجی پبلشر کی کتاب خریدنے پر مجبور نہ کیا جائے اور اسکولوں و پبلشرز کے درمیان کسی بھی قسم کی مالی بے ضابطگی نہ ہو۔

آخر میں ڈی آئی او ایس نے والدین سے اپیل کی ہے کہ اگر کہیں بھی اس طرح کی کوئی شکایت ہو تو فوراً محکمہ کو اطلاع دیں۔ انتظامیہ نے واضح کیا ہے کہ نئی تعلیمی پالیسی کے تحت اصلاحات کا مقصد تعلیم کے معیار کو بہتر بنانا ہے، نہ کہ والدین پر اضافی بوجھ ڈالنا۔

---------------

ہندوستان سماچار / سید کامران علی گڑھ