حیدرآباد، 30 مارچ (ہ س)۔ گذشتہ اتوار 29 مارچ کی رات سے راجندر نگر روڈ پر کشیدگی بڑھ گئی، جب تین آٹو رکشہ ڈرائیور ٹیلی کام ٹاور پر چڑھ گئے اور حکومت کی جانب سے مناسب آٹو ایل پی جی گیس کی فراہمی کو یقینی بنانے میں ناکامی کے خلاف احتجاج کیا۔

ڈسپنسنگ اسٹیشنوں پر آٹو ایل پی جی گیس کی ناکافی سپلائی کے پیش نظر آٹو ڈرائیوروں کو پریشانی کا سامنا کرنا پڑ رہا ہے۔

شہر میں گیس ڈسپنسنگ اسٹیشنوں پر 2 سے 3 کلومیٹر تک لمبی قطاریں نظرآرہی ہیں۔ اس مسئلہ پر مشتعل آٹو ڈرائیوروں نے راجندر نگر روڈ کو بلاک کر دیا اور تین ڈرائیور ٹیلی کام ٹاور پر چڑھ گئے۔

پولیس نے موقع پر پہنچ کر آٹو ڈرائیوروں کو زبردستی سڑک سے ہٹا دیا۔ صورتحال پر قابو پانے کے لیے پولیس کی اضافی ٹیمیں راجندر نگر روانہ کی گئیں۔

پولیس نے چند آٹو رکشہ ڈرائیوروں کو حراست میں لے لیا۔

کچھ لوگوں نے ضلع میں رجسٹرڈ آٹو رکشہ کو شہر میں جائز اجازت نامے کے بغیر چلانے پرایک آٹو رکشہ کو نقصان پہنچایا۔

شہر کے آٹو ڈرائیور پہلے ہی شہر میں ضلعی رجسٹرڈ آٹو چلانے کے خلاف احتجاج کر رہے ہیں اور حکومت سے اس مسئلے کی نمائندگی کر رہے ہیں۔

ہندوستھان سماچار

ہندوستان سماچار / محمدعبدالخالق