نئی دہلی، 28 مارچ (ہ س)۔ دہلی پولیس کی اسپیشل سیل نے مہاراشٹر کے پونے سے دو مطلوب بدمعاشوں کو گرفتار کیا ہے۔ دونوں ملزمان اقدام قتل اور اسلحہ ایکٹ سمیت سنگین مقدمات میں عرصہ دراز سے مفرور تھے۔ ایک سینئر پولیس افسر نے ہفتہ کو بتایا کہ گرفتار ملزمان کی شناخت روہتک (ہریانہ) کے رہنے والے لکشیہ ڈانگی اور جھجر (ہریانہ) کے رہنے والے نیرج کے طور پر کی گئی ہے۔ دونوں کے خلاف ہریانہ اور دہلی میں الگ الگ مجرمانہ مقدمات درج ہیں۔

ایک پولیس افسر کے مطابق اسپیشل سیل کی ٹیم نے تکنیکی نگرانی اور انٹیلی جنس کی بنیاد پر پونے کے چتور شرنگی علاقے میں چھاپہ مار کر دونوں ملزمان کو گرفتار کر لیا۔ ان کی گرفتاری کے بعد، دونوں کو ٹرانزٹ ریمانڈ پر دہلی لایا گیا اور فی الحال پولیس حراست میں ان سے پوچھ گچھ کی جا رہی ہے۔ پولیس حکام کے مطابق لکشیہ ڈانگی اور نیرج کے خلاف روہتک کے اربن اسٹیٹ تھانہمیں آرمس ایکٹ اور دیگر دفعات کے تحت مقدمہ درج کیا گیا ہے۔ اس کے ساتھ ہی، دونوں کے خلاف دہلی کے بیگم پور پولیس اسٹیشن میں قتل کی کوشش سمیت دیگر سنگین دفعات کے تحت مقدمہ درج کیا گیا ہے۔

تفتیش سے معلوم ہوا ہے کہ دونوں ملزمان پولیس سے بچنے کے لیے کافی عرصے سے مختلف ریاستوں میں روپوش تھے۔ اسپیشل سیل ان کی سرگرمیوں پر نظر رکھے ہوئے تھی اور ان کے مقام کی نشاندہی کرنے پر، ٹیم نے کارروائی کی اور انہیں گرفتار کر لیا۔ پولیس اب دونوں ملزمان سے ان کے نیٹ ورک اور دیگر ساتھیوں کے بارے میں معلومات اکٹھی کرنے کے لیے پوچھ گچھ کر رہی ہے۔ حکام کا کہنا ہے کہ اس گرفتاری سے کئی دیگر مقدمات کا پردہ فاش ہونے کا امکان ہے۔

ہندوستھان سماچار

ہندوستان سماچار / محمد شہزاد