مدھیہ پردیش میں موسم پھر بدلے گا، اگلے 24 گھنٹوں میں 7 اضلاع میں آندھی اور بارش کا الرٹ، 3 دن تک اثر رہے گا

بھوپال، 27 مارچ (ہ س)۔ مدھیہ پردیش میں ایک بار پھر موسم کروٹ لینے جا رہا ہے۔ مغربی ڈسٹربنس اور گردابی سسٹم کے سرگرم ہونے سے آج جمعہ سے ریاست کے کئی حصوں میں آندھی اور بارش کا دور شروع ہونے کا امکان ہے۔ اگلے 24 گھنٹوں میں گوالیار سمیت 7 اضلاع میں تیز ہواوں اور بارش کو لے کر الرٹ جاری کیا گیا ہے۔

محکمہ موسمیات کے مطابق، یہ صورتحال 30 مارچ تک برقرار رہ سکتی ہے۔ ریاست کے بالائی حصے میں مغربی ڈسٹربنس سرگرم ہے، جبکہ مغربی علاقے میں دو گردابی سسٹم بنے ہوئے ہیں۔ ان کے اثر سے گوالیار، بھنڈ، دتیا، نیواڑی، ٹیکم گڑھ، چھترپور اور پنا میں تیز ہوا کے ساتھ بارش ہو سکتی ہے۔ یہاں 40 سے 50 کلومیٹر فی گھنٹہ کی رفتار سے آندھی چلنے کا بھی امکان ظاہر کیا گیا ہے۔ اس کے علاوہ بھوپال، اندور اور اجین سمیت قریب 28 اضلاع میں بھی 30 مارچ تک بارش کے آثار ہیں۔ 28 مارچ کو کچھ علاقوں میں ہلکی بوندا باندی ہو سکتی ہے، جبکہ 30 مارچ کو موسم کا اثر سب سے زیادہ دیکھنے کو ملے گا۔

بارش سے پہلے ریاست میں گرمی نے بھی تیور دکھائے۔ جمعرات کو نرمدا پورم میں زیادہ سے زیادہ درجہ حرارت 41.6 ڈگری سیلسیس درج کیا گیا، جو اس سیزن کا سب سے زیادہ رہا۔ اس کے علاوہ رتلام میں 39.6 ڈگری، گنا میں 38.6 ڈگری، دھار، رائسین اور منڈلا میں 38.4 ڈگری درجہ حرارت درج ہوا۔ کئی دیگر اضلاع میں بھی درجہ حرارت 37 ڈگری سے اوپر رہا۔ بڑے شہروں کی بات کریں تو اجین میں سب سے زیادہ 37.7 ڈگری درجہ حرارت درج کیا گیا۔ بھوپال میں 37.4 ڈگری، اندور میں 37.2 ڈگری، گوالیار میں 38.6 ڈگری اور جبل پور میں 37.5 ڈگری سیلسیس رہا۔

واضح رہے کہ مارچ میں اس سے پہلے بھی دو بار آندھی اور بارش کا دور آ چکا ہے، جس میں 45 سے زیادہ اضلاع میں اثر دیکھا گیا تھا اور 17 اضلاع میں ژالہ باری ہوئی تھی۔ اب تیسرا دور 27 مارچ سے شروع ہو کر 30 مارچ تک جاری رہنے کا امکان ہے۔ وہیں، محکمہ موسمیات نے آنے والے مہینوں کے حوالے سے بھی وارننگ دی ہے۔ اپریل اور مئی میں ریاست میں شدید گرمی پڑنے کا امکان ہے۔ کئی ڈویژنوں میں درجہ حرارت 45 ڈگری سیلسیس کے پار جا سکتا ہے، جس سے گرمی کا اثر مزید بڑھے گا۔

ہندوستھان سماچار

--------------

ہندوستان سماچار / انظر حسن