بھوپال میں ٹریکٹر ٹرالی کی ٹکر سے بائیک سوار نوجوان ہلاک، ڈرائیور فرار

بھوپال، 26 مارچ (ہ س)۔

مدھیہ پردیش کے دارالحکومت بھوپال کے پرولیا علاقے میں جمعرات کی صبح ایک دلدوز سڑک حادثہ میں ایک نوجوان کی موقع پر ہی موت ہو گئی۔ صبح تقریباً 10.30 بجے کام پر جا رہے بائیک سوار کو ٹریکٹر ٹرالی نے ٹکر مار دی۔ تصادم اتنا شدید تھا کہ ٹرالی کا پہیہ نوجوان کے سر پر چڑھ گیا، جس سے اس کی جائے وقوعہ پر ہی جان چلی گئی۔

پولیس کے مطابق، متوفی کی شناخت منوج وشوکرما (38 سالہ) ساکن رتن پور کالونی، پرولیا روڈ کے طور پر ہوئی ہے۔ وہ پیشے سے پلمبر تھا اور روزانہ کی طرح جمعرات کی صبح کام کے لیے گھر سے نکلا تھا۔ گھر سے محض ایک کلومیٹر دور یہ حادثہ پیش آگیا۔ عینی شاہدین کے مطابق، ٹکر کے بعد ٹریکٹر بے قابو ہو کر سڑک سے نیچے اتر گیا اور کھیت میں پلٹ گیا۔ حادثے میں ٹریکٹر ڈرائیور کو بھی چوٹیں آئیں، لیکن وہ موقع سے فرار ہو گیا۔

اطلاع ملتے ہی پولیس موقع پر پہنچ گئی اور لاش کو پوسٹ مارٹم کے لیے گاندھی میڈیکل کالج کے مردہ خانے بھیج دیا گیا۔ پولیس نے مرگ قائم کر کے معاملے کی جانچ شروع کر دی ہے اور فرار ڈرائیور کی تلاش جاری ہے۔ متوفی کی شادی سال 2015 میں ہوئی تھی اور اس کے دو چھوٹے بچے، ایک بیٹا اور ایک بیٹی ہیں۔ اس حادثے کے بعد خاندان میں غم کا ماحول ہے۔

---------------

ہندوستان سماچار / انظر حسن