ریاض،21مارچ(ہ س)۔سعودی عرب کی وزارت دفاع نے آج محض 24 گھنٹوں کے دوران مشرقی علاقے کو نشانہ بنانے والے تقریباً 45 معاندانہ ڈرونز کو تباہ کر دیا ہے، جو کسی بھی جواز یا بہانے کے بغیر پڑوسی ممالک کو نشانہ بنانے والے معاندانہ ایرانی رویے کی سنگینی کا واضح ثبوت ہے۔یہ ایرانی جارحیت ملکی خودمختاری اور بین الاقوامی قانون کی صریح خلاف ورزی ہے۔ خلیجی ممالک ان نقصانات کی مکمل ذمہ داری تہران پر عائد کرتے ہوئے اس بات پر زور دے رہے ہیں کہ متاثرہ ریاستوں کو اقوام متحدہ کے چارٹر کے آرٹیکل 51 کے تحت اپنے دفاع کا پورا حق حاصل ہے۔سعودی دفاعی نظام ایران کی جانب سے کیے جانے والے ان معاندانہ حملوں کا مسلسل مقابلہ کر رہا ہے۔ اس دفاعی نظام نے ملک کی فضائی حدود کو نشانہ بنانے والے دشمن اجسام اور میزائلوں کو تباہ کرنے اور قومی سکیورٹی کے تحفظ میں طویل تجربہ حاصل کر رکھا ہے۔

گذشتہ گھنٹوں کے دوران سعودی فرمانروا شاہ سلمان بن عبدالعزیز نے اس بات پر زور دیا کہ سعودی عرب عزت اور بلندی پر ہے۔ شاہ سلمان نے ’ایکس‘ پر اپنے اکاو¿نٹ کے ذریعے ایک تحریر میں کہاکہ ہم اللہ سبحانہ و تعالیٰ کا شکر ادا کرتے ہیں کہ اس نے ہمیں ماہ رمضان المبارک کے روزے اور قیام مکمل کرنے کی سعادت بخشی۔ ہم دعاگو ہیں کہ اللہ ہمارے امن و استحکام کو برقرار رکھے اور سرحدوں و محاذوں پر تعینات عسکری و سول شعبوں کے ہمارے بہادر ہیروز کی حفاظت فرمائے۔ آپ سب کو عید مبارک، ہمارا ملک عزت اور بلندی پر رہے۔دوسری جانب سعودی وزیر دفاع شہزادہ خالد بن سلمان نے سعودی فرمانروا شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کی جانب سے عید کی مبارکباد اور پیغامات پہنچائے۔ انہوں نے وطن کے دفاع اور غیر منصفانہ ایرانی جارحیت کا مقابلہ کرنے میں مسلح افواج کے بہادرانہ کردار کی تعریف کی۔

شہزادہ خالد بن سلمان نے ’ایکس‘ پر اپنے اکاو¿نٹ میں لکھاکہ مجھے وزارت دفاع کے قائدین اور اعلیٰ حکام سے ملاقات کر کے انہیں عید الفطر کی مبارکباد دیتے ہوئے خوشی ہوئی۔ میں نے قیادت کی جانب سے تہنیتی پیغامات اور وطن کے دفاع و بلا جواز ایرانی جارحیت کو ناکام بنانے میں ہماری مسلح افواج کے مثالی کردار کی تعریف بھی ان تک پہنچائی۔

اسی طرح سعودی وزیر داخلہ شہزادہ عبدالعزیز بن سعود نے سعودی عرب اور خطے کی موجودہ صورتحال کے تناظر میں سکیورٹی اداروں کی کوششوں کو سراہا ہے۔ انہوں نے تمام حالات میں شہریوں، مقیم افراد اور زائرین کی حفاظت و سکیورٹی کو یقینی بنانے کے لیے فرائض کی انجام دہی پر فخر کا اظہار کیا۔ انہوں نے مختلف چیلنجز سے نمٹنے کے لیے سکیورٹی فورسز کی اعلیٰ صلاحیتوں اور مسلسل تیاری کی بھی تعریف کی۔

ہندوستھان سماچار

ہندوستان سماچار / Mohammad Khan