آکلینڈ (نیوزی لینڈ)، 20 مارچ (ہ س)۔ نیوزی لینڈ کی خواتین ٹیم نے پانچ میچوں کی ٹی ٹوئنٹی سیریز کے تیسرے میچ میں جنوبی افریقہ کی خواتین ٹیم کو چھ وکٹوں سے شکست دے دی۔ اس فتح کے ساتھ ہی میزبان ٹیم نے سیریز میں 2-1 کی برتری حاصل کر لی اور اب وہ سیریز جیتنے سے صرف ایک قدم دور ہے۔

آکلینڈ کے ایڈن پارک میں کھیلے گئے میچ میں جنوبی افریقہ کی خواتین ٹیم نے ٹاس جیت کر پہلے بیٹنگ کرتے ہوئے مقررہ 20 اوورز میں سات وکٹوں پر 149 رنز بنائے۔ ٹیم کی کپتان لورا ولواڈٹ نے 39 گیندوں میں تین چوکوں کی مدد سے 37 رنز بنائے۔ اینری ڈرکسن نے 18 گیندوں میں 27 اور چلو ٹریون نے 12 گیندوں پر 15 رنز بنائے۔ آخری اوورز میں کیلا رینیکے نے 20 گیندوں پر ناقابل شکست 34 رنز بنا کر ٹیم کو باعزت اسکور تک پہنچا دیا۔نیوزی لینڈ کی جانب سے سوفی ڈیوائن اور سوزی بیٹس نے دو دو جبکہ جیس کیر اور روزمیری مائر نے ایک ایک وکٹ حاصل کی۔150 رنز کے ہدف کے تعاقب میں نیوزی لینڈ نے 18.4 اوورز میں چار وکٹوں پر 152 رنز بنائے اور میچ چھ وکٹوں سے جیت لیا۔ ابتدا میں بلے باز ازابیلا گیج نے 15 گیندوں میں 17 اور کپتان امیلیا کیر نے 28 گیندوں میں 30 رنز بنائے۔ اس کے بعد سوفی ڈیوائن نے شاندار اننگز کھیلی اور 38 گیندوں پر ناقابل شکست 55 رنز بنائے جس میں چھ چوکے اور ایک چھکا شامل تھا۔ میڈی گرین نے بھی 25 گیندوں پر ناقابل شکست 34 رنز کی مفید اننگز کھیلی۔

دونوں بلے بازوں کے درمیان شاندار شراکت کی بدولت نیوزی لینڈ نے ہدف صرف 18.4 اوورز میں حاصل کر کے میچ جیت لیا۔ سوفی ڈیوائن کو ان کی آل راو¿نڈ کارکردگی پر پلیئر آف دی میچ قرار دیا گیا۔اب سیریز کا چوتھا میچ 22 مارچ کو ویلنگٹن کے اسکائی اسٹیڈیم میں کھیلا جائے گا جب کہ پانچواں اور آخری میچ 25 مارچ کو کرائسٹ چرچ کے ہیگلے اوول میں کھیلا جائے گا۔

ہندوستھان سماچار

ہندوستان سماچار / Mohammad Khan