دوحہ، 19 مارچ (ہ س)۔ ایران نے قطر کے راس لفان انڈسٹریل سٹی پر میزائل حملہ کیا ہے۔ یہاں دنیا کا سب سے بڑا مائع قدرتی گیس (ایل این جی) برآمدی ٹرمینل واقع ہے۔ ایران نے اسی ٹرمینل کو نشانہ بنایا ہے۔ یہ حملہ 18 اور 19 مارچ کی درمیانی شب کیا گیا۔ قطر نے کہا ہے کہ ملک کی اہم گیس تنصیب راس لفان انڈسٹریل سٹی پر ایرانی میزائل حملوں سے کافی نقصان ہوا ہے۔

اے بی سی نیوز اور الجزیرہ کی رپورٹ کے مطابق، قطر کی وزارت خارجہ نے ایران کے حملے کی سخت مذمت اور ملامت کی ہے۔ وزارت نے کہا کہ حملے کے باعث ٹرمینل میں آگ لگ گئی۔ رپورٹ کے مطابق، قطر کے حکام نے بتایا کہ ایران نے پانچ بیلسٹک میزائل داغے۔ ان میں سے چار کو فضا میں ہی تباہ (انٹرسیپٹ) کر دیا گیا، لیکن ایک میزائل ٹرمینل پر گرا۔ ایران نے اس کے علاوہ ڈرونز کا بھی استعمال کیا۔

قطر انرجی نے تصدیق کی ہے کہ حملے کے باعث ٹرمینل پر شدید آگ لگ گئی اور بنیادی ڈھانچے کو بڑے پیمانے پر نقصان پہنچا ہے۔ تاہم، کسی کے ہلاک یا زخمی ہونے کی اطلاع نہیں ہے۔ راس لفان سے دنیا کی تقریباً 20 فیصد ایل این جی کی سپلائی ہوتی ہے۔ اس حملے کے بعد قطر نے ایل این جی کی پیداوار فی الحال روک دی ہے، جس سے عالمی توانائی کی مارکیٹ میں کھلبلی مچ گئی ہے۔ برینٹ کروڈ (خام تیل) کی قیمتوں میں سات فیصد سے زائد کا اضافہ ہو گیا ہے۔

قطر نے اس حملے کو اپنی خودمختاری کی خلاف ورزی اور قومی سلامتی کے لیے براہِ راست خطرہ قرار دیا ہے۔ ردِعمل کے طور پر، قطر نے ایرانی سفارت خانے کے فوجی اور سیکورٹی حکام کو ملک چھوڑنے کا حکم دے دیا ہے۔ اسی دوران ایران نے متحدہ عرب امارات (یو اے ای) کے حبشان گیس پلانٹ اور سعودی عرب کی ریفائنریوں کو بھی نشانہ بنانے کی وارننگ دی ہے، جس کے بعد وہاں سیکورٹی الرٹ جاری کر دیا گیا ہے۔

ابوظہبی میڈیا آفس نے بتایا کہ میزائلوں کو روکنے کے دوران گرنے والے ملبے کی وجہ سے ابوظہبی کے قریب واقع گیس پلانٹس بند کر دیے گئے ہیں۔ میزائلوں نے حبشان گیس پلانٹ اور باب آئل فیلڈ کو نشانہ بنایا تھا۔ آفس نے بتایا کہ گیس پلانٹ میں کام کاج روک دیا گیا ہے۔ متحدہ عرب امارات کی وزارت خارجہ نے کہا کہ وہ ان پلانٹس کو نشانہ بنانے والے ایرانی حملے کی سخت مذمت کرتی ہے۔ یہ حملے بین الاقوامی قانون کی خلاف ورزی ہیں۔

ہندوستھان سماچار

---------------

ہندوستان سماچار / انظر حسن