ممبئی ، 18 مارچ (ہ س) مہاراشٹر حکومت نے معذور افراد کے لیے “دیویانگ سہایک پورٹل” کے نام سے ایک جامع ڈیجیٹل پلیٹ فارم متعارف کرایا ہے، جس کے ذریعے مختلف سرکاری اسکیموں اور خدمات کو ایک ہی جگہ پر فراہم کیا جا رہا ہے۔

محکمہ برائے معذور بہبود کی جانب سے تیار کردہ اس پورٹل کے ذریعے شہری آسانی سے اسکیموں کی معلومات حاصل کر سکتے ہیں، آن لائن درخواست دے سکتے ہیں اور مختلف فوائد تک رسائی حاصل کر سکتے ہیں، جس سے سرکاری دفاتر کے چکر کم ہوں گے۔حکام کا کہنا ہے کہ اس نظام میں شفافیت اور رفتار کو یقینی بنانے کے لیے جدید ڈیجیٹل طریقہ کار اپنایا گیا ہے، تاکہ خدمات بروقت فراہم کی جا سکیں۔

پورٹل کا مقصد معذور شہریوں کو ایک ہی پلیٹ فارم کے ذریعے یکساں اور آسان سہولیات فراہم کرنا اور انہیں خود مختار بنانا ہے۔تمام اسکیموں سے فائدہ اٹھانے کے لیے شہریوں کو ویب سائٹ پر رجسٹریشن کرنا ضروری ہے، جبکہ یو ڈی آئی ڈی کارڈ رکھنے والوں کے لیے ای-کے وائی سی لازمی ہوگا۔

رجسٹریشن کے وقت “سِٹیزن لاگ اِن” کے ذریعے درخواست دینی ہوگی، جس میں آدھار کارڈ، یو ڈی آئی ڈی کارڈ (40 فیصد سے زائد معذوری)، پاسپورٹ سائز تصویر، موبائل نمبر اور بینک تفصیلات شامل کرنا ضروری ہوگا۔رجسٹریشن مکمل ہونے کے بعد معذور افراد مختلف اسکیموں کے لیے آن لائن درخواست دے سکیں گے، جبکہ این جی اوز کو بھی اس پلیٹ فارم سے جڑنے کی ہدایت دی گئی ہے۔

ہندوستھان سماچار

--------------------

ہندوستان سماچار / جاوید این اے