کیو، 15 مارچ (ہ س)۔ روس اور یوکرین جنگ کے درمیان یوکرین نے بڑا دعویٰ کرتے ہوئے کہا ہے کہ روس نے راتوں رات ڈرون حملے کیے، اس دوران 97 میں سے 90 ڈرون یا تو مار گرائے گئے یا پھر بے اثر کر دیے گئے۔ یوکرین کا دعویٰ ہے کہ ان میں سے زیادہ تر شاہد کامیکاز ڈرون تھے، جنہیں روس نے اپنی سرزمین کے اندر مختلف علاقوں کے ساتھ ساتھ کریمیا سے بھی لانچ کیا۔

یوکرین کی قومی خبر رساں ایجنسی یوکرین نیشنل نیوز (یو این این) کے مطابق یوکرین کے فضائی دفاعی نظام نے ہفتے کی رات ایک بڑے روسی ڈرون حملے کو ناکام بنا دیا۔ یوکرین کی فضائیہ کے مطابق، دفاعی فورسز نے روس کی طرف سے فائر کیے گئے 97 ڈرونز میں سے 90 کو الیکٹرانک سسٹم کا استعمال کرتے ہوئے مار گرایا یا اسے بے اثر کر دیا۔

یوکرین کی مسلح افواج کی فضائیہ نے اطلاع دی ہے کہ روس نے مختلف قسم کے حملہ آور ڈرونز کا استعمال کیا، جن میں شاہد، جربیرا، اور اٹلماس ماڈل شامل ہیں۔ ان میں سے تقریباً 70 شاہد کلاس کامیکاز ڈرون تھے، جو عام طور پر بڑے پیمانے پر حملوں کے لیے استعمال کیے جاتے ہیں۔

یوکرین کے مطابق یہ ڈرون روس کے برائنسک، اوریول، کرسک اور ملیروو کے علاقوں کے ساتھ ساتھ عارضی طور پر مقبوضہ کریمیا سے بھی لانچ کیے گئے۔ یوکرین کے فضائی دفاعی یونٹس، طیارہ شکن میزائل سسٹم، الیکٹرانک وارفیئر یونٹس، ڈرون یونٹس، اور موبائل فائر گروپس کی مشترکہ کوششوں سے اس حملے کو کامیابی سے پسپا کیا گیا۔

تاہم فوج کے مطابق پانچ ڈرون پانچ الگ الگ مقامات پر گر کر تباہ ہوئے جبکہ مار گرائے جانے والے ڈرونز کا ملبہ بھی دو مختلف علاقوں میں گرنے کی اطلاعات ہیں۔ فضائیہ نے نوٹ کیا کہ حملہ صبح تک جاری رہا، اور کچھ ڈرون یوکرین کی فضائی حدود میں سرگرم رہے۔

ہندوستھان سماچار

---------------

ہندوستان سماچار / عبدالواحد