نئی دہلی/تہران، 13 مارچ (ہ س)۔ ہندوستان اور ایران کے وزرائے خارجہ نے ٹیلی فون پر بات چیت کی جس میں امریکہ اور اسرائیل کے ساتھ بڑھتی ہوئی کشیدگی کے بعد علاقائی اور بین الاقوامی صورتحال پر تبادلہ خیال کیا گیا۔

وزیر خارجہ ڈاکٹر ایس جے شنکر نے جمعہ کو میٹنگ کی بریفنگ دی۔ انہوں نے کہا کہ جمعرات کی شب ایرانی وزیر خارجہ سید عباس عراقچی کے ساتھ ایک اور بات چیت ہوئی۔ دو طرفہ امور کے ساتھ ساتھ برکس سے متعلقہ امور پر تبادلہ خیال کیا گیا۔

ایران کی وزارت خارجہ نے ایک بیان میں کہا ہے کہ وزیر خارجہ عراقچی نے اپنے ہندوستانی ہم منصب جے شنکر کو ایران کے خلاف امریکہ اور اسرائیل کے مبینہ جارحانہ اقدامات اور ان کے علاقائی اور عالمی استحکام پر پڑنے والے اثرات سے آگاہ کیا۔

عراقچی نے کہا کہ ایرانی حکومت، عوام اور مسلح افواج حملوں کے خلاف اپنے دفاع کا جائز حق استعمال کرنے کے لیے پرعزم ہیں۔ انہوں نے علاقائی اور بین الاقوامی اداروں کو ایران کے خلاف فوجی جارحیت کی مذمت کرنے کی ضرورت پر بھی زور دیا۔

ایرانی وزیر خارجہ نے کثیرالجہتی تعاون کے پلیٹ فارم کے طور پر برکس کی اہمیت کا ذکر کرتے ہوئے کہا کہ موجودہ حالات میں اس پلیٹ فارم کو علاقائی اور عالمی استحکام اور سلامتی کی حمایت میں تعمیری کردار ادا کرنا چاہیے۔

قابل ذکر ہے کہ مغربی ایشیا میں فوجی تنازعہ کے بعد ڈاکٹر جے شنکر اور اراغچی کے درمیان یہ چوتھی بات چیت ہے۔ مغربی ایشیا میں بحران نے آبنائے ہرمز کے ذریعے تجارتی بحری جہازوں کی آمد و رفت کو متاثر کیا ہے۔ پچھلی بات چیت میں، وزیر خارجہ جے شنکر نے اپنے ایرانی ہم منصب کے ساتھ تجارتی جہاز رانی کی حفاظت اور توانائی کی سلامتی کا مسئلہ اٹھایاتھا۔

---------------

ہندوستان سماچار / عبدالسلام صدیقی