جموں و کشمیر کے بالائی علاقوں میں ہلکی برفباری

جموں، 11 مارچ (ہ س)۔ جموں و کشمیر کے میدانی علاقوں میں گزشتہ چوبیس گھنٹوں کے دوران بارش ہوئی جبکہ بدھ کے روز بالائی علاقوں میں درمیانی درجے کی برف باری درج کی گئی۔ محکمہ موسمیات کے حکام کے مطابق گزشتہ چوبیس گھنٹوں کے دوران ہونے والی بارش اور برف باری کے باعث درجہ حرارت میں کمی آئی ہے۔

محکمہ موسمیات نے بتایا کہ اس عرصے کے دوران جموں و کشمیر کے کئی علاقوں میں ہلکی سے درمیانی بارش اور بالائی علاقوں میں برف باری ہوئی۔ ضلع کشتواڑ، گاندربل، اننت ناگ، کپواڑہ اور بانڈی پورہ کے بعض اونچے مقامات پر درمیانی درجے کی برف باری درج کی گئی۔

محکمہ موسمیات کے مطابق 14 مارچ تک موسم مجموعی طور پر خشک رہنے کی توقع ہے، جبکہ 15 مارچ سے 20 مارچ کے دوران موسم ابر آلود رہنے کے ساتھ بالائی علاقوں میں ہلکی بارش اور برف باری کا امکان ہے۔ محکمہ موسمیات نے کسانوں کو مشورہ دیا ہے کہ وہ 12 مارچ تک زرعی سرگرمیاں معطل رکھیں۔

ہندوستھان سماچار

---------------

ہندوستان سماچار / محمد اصغر