جموں و کشمیر حکومت نے تخریبی سرگرمیوں میں ملوث تین عارضی ملازمین کو نوکری سے فارغ کر دیا

جموں، 10 مارچ (ہ س)۔ جموں و کشمیر کی حکومت نے مبینہ طور پر ملک دشمن اور تخریبی سرگرمیوں میں ملوث ہونے کے الزام میں محکمہ جل شکتی کے تین عارضی ملازمین کو ملازمت سے فارغ کر دیا ہے۔

سرکاری حکم نامے کے مطابق ضلع اننت ناگ کے بیجبہاڑہ علاقے کے رہائشی شوکت احمد زرگر ولد نذیر احمد زرگر کو فوری طور پر نوکری سے برخاست کر دیا گیا ہے۔ حکام کے مطابق ان کے خلاف اقدامِ قتل، اسلحہ قانون اور غیر قانونی سرگرمیوں کی روک تھام سے متعلق قانون کے تحت مقدمہ درج ہے اور معاملہ عدالت میں زیر سماعت ہے۔

اسی طرح ضلع کشتواڑ کے ہلر علاقے کے رہائشی لیاقت علی باگوان ولد عزیز محمد باگوان اور کوثر حسین باگوان ولد محمد اکبر باگوان کو بھی ملازمت سے فارغ کر دیا گیا ہے۔ حکام کے مطابق ان دونوں کے خلاف بھی غیر قانونی سرگرمیوں کی روک تھام سے متعلق قانون کے تحت مقدمات درج ہیں اور معاملہ عدالت میں زیر سماعت ہے۔ حکام کے مطابق یہ کارروائی محکمہ داخلہ کی سفارش پر انتظامی مفاد میں عمل میں لائی گئی ہے۔

ہندوستھان سماچار

---------------

ہندوستان سماچار / محمد اصغر