ممبئی ، یکم مارچ (ہ س)۔ اتوار کے روز جنوبی ممبئی کے مصروف فورٹ علاقے میں واقع بابیل ہوٹل میں آگ لگنے کے واقعہ نے سنسنی پھیلا دی، تاہم بروقت ریسکیو کارروائی کے باعث کوئی جانی نقصان نہیں ہوا۔ اس حادثے میں ہوٹل کی املاک کو بھاری مالی نقصان پہنچا۔یہ ہوٹل جی پی او کے سامنے والچند ہیر چند روڈ پر واقع ہے جہاں آگ بھڑکنے کے فوراً بعد فائر بریگیڈ کو اطلاع دی گئی۔ عملہ چند ہی لمحوں میں جائے وقوعہ پر پہنچ گیا اور آگ کو پھیلنے سے روکنے کے لیے بڑے پیمانے پر آپریشن شروع کیا گیا۔ آگ پہلی اور دوسری منزل تک محدود رہی جس سے تقریباً 2000 مربع فٹ علاقہ متاثر ہوا۔شعلوں کی لپیٹ میں آ کر ہوٹل کا فرنیچر، گدے، برقی تاریں اور دیگر سامان جل گیا۔ ریسکیو آپریشن میں پولیس، ایمبولینس سروس، بی ایم سی کے اہلکار اور بجلی محکمے کی ٹیمیں بھی شامل رہیں اور کافی مشقت کے بعد آگ پر قابو پایا گیا۔فائر بریگیڈ حکام نے بتایا کہ واقعے کی وجوہات کا پتہ لگانے کے لیے تفتیش جاری ہے اور ابتدائی اندازے کے مطابق برقی شارٹ سرکٹ آگ لگنے کا سبب بن سکتا ہے۔ہندوستھان سماچار

ہندوستان سماچار / جاوید این اے