اے ایم یوکے شعبہ تعلیم میں ’تقریب ذائقہ‘ کا اہتمام

علی گڑھ، 17 فروری (ہ س)۔ علی گڑھ مسلم یونیورسٹی کے شعبہ تعلیم نے انٹیگریٹیڈ ٹیچر ایجوکیشن پروگرام (آئی ٹی ای پی) کے تحت ”تقریب ذائقہ 2.0“ کا اہتمام کیا، جسے تخلیقی صلاحیت، ثقافتی تنوع اور پکوان کی مہارتوں کے رنگا رنگ جشن کے طور پر منایا گیا۔ یہ فیسٹیول آرٹس ایجوکیشن اور ہنر فروغ کورسز کے نصاب کا حصہ تھا، جس کے تحت آئی ٹی ای پی کے طلبہ کو اپنے فنّی کام، تعلیمی مصنوعات، آڈیو ویژول معاون مواد اور پرفارمنگ آرٹس کے منصوبوں کی نمائش کا موقع فراہم کیا گیا۔

پروگرام کا افتتاح شعبہ تعلیم کی چیئرپرسن پروفیسر نکہت نسرین نے کیا۔ انہوں نے طلبہ کو اپنی صلاحیتوں اور کاروباری مہارتوں کو بھرپور انداز میں پیش کرنے کی ترغیب دی۔ دن بھر جاری رہنے والی اس تقریب میں گھریلو پکوانوں پر مشتمل فوڈ اسٹالز، مختلف ثقافتی ذائقوں کی نمائندگی، انٹرایکٹیو سرگرمیوں کے اسٹالز، فنّی نمائشیں، تفریحی کھیل اور موسیقی ریز پروگرام خاص توجہ کا مرکز رہے۔ ہاتھ سے تیار شدہ اشیاء پر مشتمل اسٹالز نے بھی طلبہ کی تخلیقی سوچ اور عملی صلاحیتوں کو اجاگر کیا۔ پروگرام کی نگرانی محمد شہیر صدیقی، ڈاکٹر محمد حنیف احمد، ڈاکٹر ہماپروین اور ڈاکٹر صوفیہ انجم نے کی۔

ہندوستھان سماچار

---------------

ہندوستان سماچار / سید کامران علی گڑھ