نئی دہلی، 10 فروری (ہ س): دہلی کیپٹلس نے انگلینڈ کے سابق بلے باز ایان بیل کو آئندہ انڈین پریمیئر لیگ (آئی پی ایل) 2026 کے سیزن سے قبل ٹیم کا اسسٹنٹ کوچ مقرر کیا ہے۔ فرنچائز نے منگل (10 فروری) کو سوشل میڈیا کے ذریعے باضابطہ طور پر اس فیصلے کی تصدیق کی۔

ایان بیل کا آئی پی ایل میں بطور کوچ پہلا تجربہ ہوگا، انہوں نے 118 ٹیسٹ، 161 ون ڈے اور 8 ٹی ٹوئنٹی انٹرنیشنل کھیلے ہیں۔ وہ پہلے کسی بھی آئی پی ایل فرنچائز سے وابستہ نہیں رہے ہیں۔ تاہم، 2020 میں بین الاقوامی کرکٹ سے ریٹائر ہونے کے بعد، بیل نے کوچنگ کے شعبے میں کافی تجربہ حاصل کر لیا ہے۔

ایان بیل انگلینڈ لائنز اور انڈر 19 ٹیموں کے ساتھ کام کر چکے ہیں۔ انہوں نے 2024 میں انگلینڈ کے دورے کے دوران سری لنکا کی ٹیسٹ ٹیم کے بیٹنگ کوچ کے طور پر بھی خدمات انجام دیں۔ انہوں نے 2023 کے ون ڈے ورلڈ کپ سے قبل انگلینڈ کا دورہ کرنے والی نیوزی لینڈ کی مردوں کی ٹیم کے ساتھ بھی مختصر طور پر خدمات انجام دیں۔ بیل نے انگلینڈ کی دی ہنڈریڈ لیگ میں برمنگھم فینکس مینز ٹیم کے اسسٹنٹ کوچ کے طور پر بھی خدمات انجام دیں۔

ایان بیل دہلی کیپٹلس کے کوچنگ اسٹاف کا حصہ ہوں گے، جس کی قیادت ڈائریکٹر کرکٹ وینوگوپال راو¿ کریں گے۔ ہیڈ کوچ ہیمانگ بڈانی اور بولنگ کوچ مناف پٹیل پہلے ہی سپورٹ اسٹاف کا حصہ ہیں۔

یہ بات قابل غور ہے کہ آسٹریلیا کے میتھیو موٹ آئی پی ایل 2025 میں دہلی کیپٹلز کے اسسٹنٹ کوچ تھے۔ سیزن کی مضبوط شروعات کے باوجود، ٹیم آخر میں ناکام ہوگئی، پانچویں نمبر پر رہی اور پلے آف کی جگہ سے محروم ہوگئی۔

---------------

ہندوستان سماچار / عبدالسلام صدیقی