نئی دہلی، 09 نومبر (ہ س)۔ دیوالی کے دن شمالی دہلی کے وزیرآباد علاقے میں موبائل فون اور رقم چھیننے کی کوشش کی مخالفت کرنے پر کچھ بدمعاشوں نے 16 سالہ دیوانش کا چاقو مار کر قتل کر دیا۔دہلی پولیس کے مطابق، واقعہ اتوار کی شام تقریباً 7 بجے کا ہے۔ وزیرآباد مارکیٹ کے قریب چار نامعلوم نوجوانوں نے دیوانش اور اس کے دوستوں کو گھیر لیا۔ بدمعاشوں نے اس کا موبائل فون اور رقم چھیننے کی کوشش کی، جس پر دیوانش نے مزاحمت کی۔ پولیس نے بتایا کہ سی سی ٹی وی فوٹیج میں دیکھا گیا ہے کہ دیوانش کی مخالفت کے دوران ایک ملزم نے چاقو نکال کر اس کے سینے پر وار کر دیا۔ اس کے بعد ملزمان موبائل فون اور رقم لے کر موقع سے فرار ہو گئے۔

حملے کے فوراً بعد دیوانش کے دوست اسے زخمی حالت میں قریبی نجی اسپتال لے گئے، جہاں ڈاکٹروں نے اسے مردہ قرار دے دیا۔ دیوانش کے اہل خانہ کے ایک رکن نے بتایا کہ واقعے کے وقت گھر کے تمام افراد دیوالی کی سجاوٹ میں مصروف تھے اور دیوانش بازار سے مزید پٹاخے خریدنے گیا تھا۔ اسی دوران کچھ بدمعاشوں نے اسے روک کر اس سے رقم اور موبائل فون چھیننے کی کوشش کی۔

اہل خانہ کا الزام ہے کہ نجی اسپتال نے اسے داخل کرنے سے انکار کر دیا، جس کے بعد اسے سول لائنز اسپتال لے جایا گیا، جہاں ڈاکٹروں نے اسے مردہ قرار دے دیا۔ فی الحال اس واقعے کے سلسلے میں مقدمہ درج کرکے جانچ شروع کر دی گئی ہے۔

پولیس کے مطابق، واقعے سے متعلق ایک مشتبہ حملہ آور کے بھائی کو حراست میں لیا گیا ہے، جبکہ مرکزی ملزم کی تلاش میں چھاپے مارے جا رہے ہیں۔ پولیس کا کہنا ہے کہ جلد ہی تمام ملزمان کو گرفتار کر لیا جائے گا۔

ہندوستھان سماچار

ہندوستھان سماچار / محمد شہزاد