کولکاتا، 6 نومبر(ہ س)۔

مغربی مدنی پورضلع کے مدنی پورشہر میں منشیات کی اسمگلنگ کے خلاف پولیس نے بڑی کارروائی کی ہے۔ جمعرات کی دوپہر شہر کے بڑا آستانہ علاقے میں ایک مکان پر چھاپہ مار کر پولیس نے 368.5 گرام براؤن شوگر برآمد کی ہے۔ ضبط شدہ منشیات کی تخمینہ شدہ بازاری قیمت تقریباً 1 کروڑ 50 لاکھ روپے بتائی گئی ہے۔ اس معاملے میں پولیس نے 2 ملزمان کو گرفتار کیا ہے، جبکہ مکان کا مالک شیخ صابر ابھی فرار ہے۔

مغربی میدنی پور کی پولیس سپرنٹنڈنٹ پاپیا سلطانہ نے جمعرات کی دیر رات پریس کانفرنس میں بتایا کہ خفیہ اطلاع کی بنیاد پر ڈی ایس پی آتیہ رحمان کی قیادت میں پولیس کی خصوصی ٹیم نے میدنی پور شہر کے بڑا آستانہ علاقے میں شیخ صابر کے گھر پر چھاپہ مارا۔ اس دوران 3 پیکٹوں میں رکھی مجموعی طور پر 368.5 گرام براؤن شوگر برآمد ہوئی۔

پولیس نے موقع سے تقریباً 52 گرام سونے کے زیورات بھی ضبط کیے ہیں، جن کی تخمینہ شدہ قیمت ساڑھے 8 لاکھ روپے ہے۔ اس کے علاوہ 4 لاکھ 65 ہزار روپے نقد، تقریباً 40 ہزار روپے مالیت کے چاندی کے زیورات اور وزن کرنے والی 3 مشینیں بھی برآمد کی گئی ہیں۔ اس معاملے میں گرفتار ملزمان کی شناخت شیخ شریف الدین اور شیخ راجیش کے طور پر ہوئی ہے۔ شریف الدین کوتوالی تھانہ علاقے کے بڑا آستانہ اور راجیش شیریش باغان علاقے کا رہنے والا ہے۔ جس مکان پر چھاپہ مارا گیا، اس کا مالک شیخ صابر فی الحال فرار ہے۔

پولیس سپرنٹنڈنٹ نے بتایا کہ ابتدائی جانچ میں معلوم ہوا ہے کہ ملزمان کھڑگ پور سے براؤن شوگر خرید کر لاتے تھے۔ اس کے بعد ایک اور 2 گرام کی چھوٹی چھوٹی پڑیاں بنا کر مقامی علاقے میں فروخت کرتے تھے۔ اس کام میں بچوں کا بھی استعمال کیا جاتا تھا۔ پولیس کو شبہ ہے کہ اس غیر قانونی کاروبار کے پیچھے ایک بڑا گروہ سرگرم ہے، جو طویل عرصے سے علاقے میں منشیات کی فروخت کر رہا تھا۔

پولیس اب اس گروہ سے وابستہ دیگر افراد اور منشیات کی فراہمی کے ذرائع کا پتہ لگانے میں مصروف ہے۔ پولیس سپرنٹنڈنٹ نے کہا کہ منشیات کے خلاف پورے بنگال میں مہم چلائی جا رہی ہے۔ مغربی میدنی پور ضلع میں بھی یہ مہم مسلسل جاری رہے گی، تاکہ بچوں اور طلبہ کو نشے کی لت میں مبتلا ہونے سے بچایا جا سکے۔

ہندوستھان سماچار

ہندوستھان سماچار / انظر حسن