آلودگی اور گندگی سے بدحال ہے میرک جھیل ، وجود بچانے کی جدوجہد کے درمیان 100 کروڑ روپے کے ترقیاتی منصوبے سے امیدیں وابستہ
دارجلنگ، 17 نومبر (ہ س)۔ 1970 کی دہائی کے وسط میں دارجلنگ کی بھیڑ بھاڑ اور شور و غل سے دور سکون کی تلاش میں آنے والے سیاحوں کے لیے سنتروں اور چائے کے باغات سے گھرا میرک ایک پسندیدہ سیاحتی مقام بن کر ابھرا ۔ اس خوبصورت پہاڑی شہر کی سب سے بڑی کشش اس
MIRIK-LAKE-POLLUTION-AND-FILTH


دارجلنگ، 17 نومبر (ہ س)۔ 1970 کی دہائی کے وسط میں دارجلنگ کی بھیڑ بھاڑ اور شور و غل سے دور سکون کی تلاش میں آنے والے سیاحوں کے لیے سنتروں اور چائے کے باغات سے گھرا میرک ایک پسندیدہ سیاحتی مقام بن کر ابھرا ۔ اس خوبصورت پہاڑی شہر کی سب سے بڑی کشش اس کی قدرتی حسن سے مالا مال جھیل ہے۔ تاہم، تقریباً پانچ دہائیاں گزرنے کے بعد یہی سیاحتی مقام اب سنگین ماحولیاتی بحران سے دوچار ہے۔

مسلسل بڑھتی آلودگی، کچرے اور ہوٹلوں سے نکلنے والے گندے پانی کی براہ راست جھیل میں نکاسی نے شہر کی شہ رگ سمجھی جانے والی میرک جھیل کی حالت انتہائی خراب کر دی ہے۔ جھیل کے وجود کو بچانے کے لیے اب اس کے تحفظ کی ضرورت شدت سے محسوس کی جا رہی ہے۔

میرک میونسپلٹی کے سابق چیئرمین ایل بی رائے نے بتایا کہ گزشتہ سال عہدہ چھوڑنے سے پہلے جھیل کے اطراف خوبصورتی میں اضافے اور پانی کے نکاسی سے متعلق نظام قائم کرنے کے لیے 10 کروڑ روپے کے منصوبے کا ٹینڈر جاری کیا گیا تھا۔ تاہم، اس کے بعد اس منصوبے پر کتنا کام ہوا، اس کی انہیں کوئی اطلاع نہیں ہے۔

جھیل کی خستہ حالی کو دیکھتے ہوئے اب میرک ہوٹل اونرس ایسوسی ایشن بھی اس کے تحفظ کے لیے آگے آئی ہے۔ تنظیم کے سکریٹری ہیم کمار تمانگ نے الزام لگایا کہ انتظامی نگرانی کی کمی اور طویل عرصے سے جاری لاپروائی کے باعث جھیل کی حالت مسلسل خراب ہو رہی ہے۔ نالوں کے گندے پانی اور پلاسٹک کے کچرے سے جھیل کا پانی آلودہ ہو رہا ہے۔ انہوں نے بتایا کہ جھیل کی صفائی اور تحفظ کے لیے کئی مرتبہ انتظامیہ سے درخواست کی گئی، لیکن اب تک کوئی ٹھوس نتیجہ سامنے نہیں آیا۔

اس سے قبل گورکھالینڈ ٹیریٹوریل ایڈمنسٹریشن (جی ٹی اے) کی جانب سے جھیل کی صفائی کے لیے پہل کی گئی تھی۔ اس کے تحت جھیل کے درمیان مشین نصب کرکے آلودہ پانی نکالنے کا کام شروع کیا گیا تھا، لیکن یہ منصوبہ درمیان میں ہی رک گیا۔

وہیں، جھیل کے احاطے میں بیت الخلا تعمیر کرنے کے لیے سابقہ ترنمول کانگریس حکومت کے دور میں پانچ کروڑ روپے کے منصوبے کو منظوری دی گئی تھی، لیکن وہ بھی اب تک عملی شکل اختیار نہیں کر سکا ہے۔

تاہم، مایوس کن صورت حال کے درمیان ریاستی حکومت کی جانب سے کی گئی پہل نے نئی امید پیدا کی ہے۔ گزشتہ جولائی میں ریاست کے سیاحت کے وزیر شنکر گھوش نے مرکزی حکومت کی ’ون اسٹیٹ، ون ڈیسٹینیشن‘ پالیسی کے تحت میرک کی ترقی کے لیے 100 کروڑ روپے کے منصوبے کا اعلان کیا تھا۔ فی الحال محکمہ سیاحت کی جانب سے اس سلسلے میں تفصیلی پروجیکٹ رپورٹ (ڈی پی آر) تیار کی جا رہی ہے۔ اس منصوبے کے تحت جھیل کے اطراف خوبصورتی میں اضافہ، بنیادی ڈھانچے کی ترقی اور سیاحت کے نئے مراکز تیار کرنے کی تجویز ہے۔تاہم، 100 کروڑ روپے کے اس منصوبے کے حوالے سے مقامی کاروباریوں نے ریاستی حکومت کو متنبہ کیا ہے۔

میرک میونسپلٹی میں نو وارڈ ہیں اور یہاں کی آبادی تقریباً 17 ہزار ہے۔ یہاں کے 54 ہوٹل مالکان کی تنظیم کے صدر گوپال لاما نے کہا کہ محض افسران کی سطح پر بیٹھ کر ڈی پی آر تیار کر لینا کافی نہیں ہوگا۔ منصوبے کا حتمی خاکہ تیار کرنے سے پہلے ہوٹل مالکان، ٹرانسپورٹ ملازمین، تاجروں اور ہوم اسٹے چلانے والوں کے ساتھ تبادلہ خیال کرنا بے حد ضروری ہے۔ ان کا کہنا ہے کہ مقامی لوگوں کے مسائل اور ضروریات کو سمجھے بغیر اگر منصوبہ تیار کیا گیا تو 100 کروڑ روپے کا یہ منصوبہ بھی سابقہ منصوبوں کی طرح ادھورا رہ سکتا ہے۔

مقامی کاروباریوں کے خدشات پر سیاحت کے وزیر شنکر گھوش نے کہا کہ محکمہ سیاحت تمام متعلقہ فریقوں کی رائے سننے کے لیے تیار ہے۔ انہوں نے بتایا کہ وہ جلد خود میرک کا دورہ کریں گے۔ اس دوران دارجلنگ کے رکن پارلیمنٹ راجو بشت، کرسیانگ کے رکن اسمبلی سونم لاما اور مقامی کاروباریوں کے ساتھ میٹنگ کرکے منصوبے پر عمل درآمد کی سمت میں پہل کی جائے گی۔

قابل ذکر ہے کہ 2012 سے میرک جھیل کی دیکھ بھال کی ذمہ داری جی ٹی اے کے پاس ہے۔ تاہم، جھیل کی مرمت اور یہاں جدید بوٹنگ سہولیات شروع کرنے کا مطالبہ طویل عرصے سے کیا جاتا رہا ہے، لیکن اب تک اس سمت میں کوئی ٹھوس کام نہیں ہو سکا ہے۔

جی ٹی اے کے سیاحت کے سکریٹری سونم بھوٹیا نے بھی تسلیم کیا کہ میرک جھیل کی مرمت ضروری ہے۔ انہوں نے کہا کہ ریاستی محکمہ سیاحت کی جانب سے اس سلسلے میں پہلے ہی فنڈ مختص کیا جا چکا ہے اور امید ہے کہ جلد ہی جھیل کی مرمت کا کام شروع ہو جائے گا۔ اب دیکھنا یہ ہے کہ 100 کروڑ روپے کا نیا ترقیاتی منصوبہ میرک کی کھوئی ہوئی رونق کس حد تک واپس لانے میں کامیاب ہوتا ہے۔

ہندوستھان سماچار

ہندوستھان سماچار / محمد شہزاد


 rajesh pande