
- محکمہ نے 27-2026 میں 859 مستفیدین کو 3800 لاکھ روپے سے زیادہ کی مالی مدد فراہم کرکے خود کفیل بنایا
بھوپال، 17 نومبر(ہ س)۔ مدھیہ پردیش میں پسماندہ طبقات اور اقلیتی نوجوانوں کو خود روزگار سے جوڑنے کے لیے چلائی جا رہی وزیر اعلیٰ کاروباری منصوبے کے تحت سال 27-2026 میں اب تک 859 مستفیدین کو 38.34 کروڑ روپے کا قرض اور مالی امداد فراہم کی گئی ہے۔ نرمداپورم کے انشول چورے نے اس منصوبے کے تحت ملنے والے 25 لاکھ روپے کے قرض سے جے سی بی مشین خرید کر اپنا کاروبار شروع کیا۔ ان کی کامیابی اب علاقے کے دیگر نوجوانوں کے لیے بھی خود روزگار کی ترغیب بن رہی ہے۔
محکمہ رابطہ عامہ کی افسر اونتیکا جیسوال نے منگل کو معلومات دیتے ہوئے بتایا کہ مدھیہ پردیش کے وزیر اعلیٰ ڈاکٹر موہن یادو کی دور اندیش قیادت اور پسماندہ طبقات و اقلیتی بہبود کی وزیر مملکت کرشنا گور کی مسلسل رہنمائی میں پسماندہ طبقات اور اقلیتوں کے مالی و ترقیاتی کارپوریشن کے ذریعے چلائی جا رہی اسکیمیں نوجوانوں کے خوابوں کو شرمندۂ تعبیر کر رہی ہیں۔ مدھیہ پردیش حکومت کی عوامی فلاح و بہبود کی اسکیمیں سماج کے آخری صف کے فرد کو بھی سماجی اور معاشی طور پر بااختیار بنانے میں تاریخی ثابت ہو رہی ہیں۔
انہوں نے بتایا کہ مدھیہ پردیش کے محکمہ پسماندہ طبقات و اقلیتی بہبود کے ذریعے چلائی جا رہی اسکیموں کے تحت ریاست میں نوجوانوں کو مالی مدد فراہم کرکے صنعت اور خود روزگار سے جوڑا جا رہا ہے۔ سال 27-2026 میں ’مکھیہ منتری پچھڑا ورگ اور الپ سنکھیک ادیم یوجنا‘ (وزیر اعلیٰ پسماندہ طبقات اور اقلیتوں کے کاروباری منصوبے) کے تحت اب تک 859 مستفیدین کو 3834.24 لاکھ روپے کا قرض اور مالی امداد فراہم کرکے فائدہ پہنچایا گیا ہے۔ ریاستی حکومت کا یہ عزم ریاست کے پسماندہ طبقات اور اقلیتی برادری کو معاشی طور پر مضبوط، خود کفیل اور بااختیار بنانے کی سمت نئے ریکارڈ قائم کر رہا ہے۔
محکمہ رابطہ عامہ کی افسر نے بتایا کہ ضلع نرمداپورم کے رہنے والے انشول چورے، ولد وجے کمار چورے، کی کامیابی کی کہانی مدھیہ پردیش حکومت کے فلاحی نظریے کی براہِ راست مثال ہے۔ محدود مالی وسائل کے باعث انشول اپنی روزی روٹی چلانے کے لیے مسلسل جدوجہد کر رہے تھے۔ ان کا خواب اپنی جے سی بی مشین خرید کر باعزت طریقے سے خود روزگار قائم کرنے کا تھا۔
اس مشکل صورت حال میں مدھیہ پردیش حکومت کی ’مکھیہ منتری پچھڑا ورگ اور الپ سنکھیک ادیم یوجنا‘ نے ان کے لیے زندگی کا سہارا فراہم کیا۔ اس منصوبے کے تحت محکمہ نے انشول چورے کے لیے 25.00 لاکھ روپے کے قرض کی منظوری دی۔ اس مالی تعاون سے انہوں نے جے سی بی مشین خرید کر اپنا کاروبار شروع کیا۔ آج وہ نہ صرف خود اعتمادی اور عزتِ نفس کے ساتھ روزی کما رہے ہیں، بلکہ علاقے کے دیگر نوجوانوں کے لیے بھی ترغیب کا ذریعہ بن گئے ہیں۔
انشول چورے نے خوشی کا اظہار کرتے ہوئے کہا کہ ’’حکومت کی یہ اسکیم میری زندگی میں نئی صبح لے کر آئی ہے۔ جے سی بی اب محض میری روزی روٹی کا ذریعہ نہیں، بلکہ میری عزتِ نفس اور روشن مستقبل کی علامت ہے۔ ریاستی حکومت کی یہ اسکیمیں ضرورت مندوں کو ترقی کی راہ پر آگے بڑھانے میں نعمت ثابت ہو رہی ہیں۔‘‘
ہندوستھان سماچار
---------------
ہندوستھان سماچار / انظر حسن