
گوپیشور، 16 نومبر (ہ س)۔ پہاڑی علاقوں سے روزگار کی تلاش میں نوجوانوں کی نقل مکانی عام بات ہے، لیکن کچھ نوجوان ایسے بھی ہیں جو ملازمت چھوڑ کر اپنے گاوں واپس لوٹ رہے ہیں اور روزگار کے نئے امکانات تلاش کر رہے ہیں۔ گوپیشور کے نیرج بھٹ نے بھی اسی راستے کا انتخاب کیا ہے۔ نجی کمپنیوں میں ملازمت کرنے کے بعد وہ اپنے آبائی علاقے واپس آئے اور اب مٹی کے بغیر ایروپونکس ٹیکنالوجی کے ذریعے زعفران اگا کر خود روزگار کی ایک نئی مثال قائم کر رہے ہیں۔
بایوٹیکنالوجی میں بی ٹیک کرنے والے نیرج نے نجی شعبے میں ملازمت کی، لیکن پہاڑوں میں رہ کر کچھ نیا کرنے کی خواہش انہیں واپس لے آئی۔ انہوں نے روایتی زراعت کے بجائے اسے ایک جدید کاروبار کے طور پر اپنانے کا منصوبہ بنایا۔ اس کی شروعات لیز پر زمین لے کر پولی ہاوس قائم کرنے سے کی۔ محکمہ باغبانی کے تعاون سے انہوں نے للیئم پھولوں کی پیداوار شروع کی اور بعد میں کیوی کی کاشت کی جانب بھی قدم بڑھایا۔
زراعت میں نئے تجربات کی تلاش کے دوران انہیں انٹرنیٹ کے ذریعے ایروپونکس ٹیکنالوجی سے زعفران کی پیداوار کے بارے میں معلومات حاصل ہوئیں۔ انہوں نے اس ٹیکنالوجی کو سمجھنے کے لیے مطالعہ کیا اور سال 2024 میں گوپیشور میں زعفران کی پیداوار شروع کردی۔ اس ٹیکنالوجی کی خاص بات یہ ہے کہ اس میں روایتی کھیتی کی طرح مٹی کی ضرورت نہیں ہوتی۔ پودوں کی جڑوں تک کنٹرول شدہ طریقے سے غذائی اجزا کا محلول پہنچایا جاتا ہے۔ نیرج کو پہلی ہی فصل میں تقریباً ایک لاکھ روپے مالیت کا زعفران حاصل ہوا۔
نیرج کی یہ پہل پہاڑی علاقوں میں نقل مکانی کے رجحان کو پلٹنے کی ایک ایسی مثال پیش کرتی ہے، جس میں پہاڑ کا نوجوان اپنی تعلیم اور تکنیکی مہارت کا استعمال اپنے ہی علاقے میں روزگار کے مواقع پیدا کرنے کے لیے کر رہا ہے۔ ملازمت کی تلاش میں پہاڑ چھوڑنے کے بجائے وہیں روزگار پیدا کرنے کی ان کی کوشش مقامی نوجوانوں کے لیے ایک نئی راہ کھول سکتی ہے۔
سرکاری اسکیم سے ملی حوصلہ افزائی
نیرج کے اس اختراعی کام کو آگے بڑھانے کے لیے محکمہ باغبانی بھی تعاون کر رہا ہے۔ زعفران کی پیداوار کے یونٹ کے قیام کے لیے پردھان منتری مائیکرو فوڈ پروسیسنگ انٹرپرائزز اپ گریڈیشن اسکیم کے تحت 20 لاکھ روپے کے پروجیکٹ کو منظوری دی گئی ہے۔ اس کے تحت پروجیکٹ کی لاگت کا 35 فیصد مرکزی حکومت اور 25 فیصد ریاستی حکومت سبسڈی کے طور پر فراہم کرتی ہے، جبکہ باقی رقم قرض کے ذریعے دستیاب کرائی جاتی ہے۔
نوجوانوں کو گاوں واپس آنے کا پیغام
نیرج کا ماننا ہے کہ زراعت اب صرف روایتی طریقوں تک محدود نہیں رہی ہے۔ سائنسی معلومات، جدید ٹیکنالوجی اور سرکاری اسکیموں کا صحیح استعمال کرکے نوجوان اسے ایک منافع بخش کاروبار بنا سکتے ہیں۔ ان کی کوشش ہے کہ دوسرے نوجوان بھی اپنے علاقوں میں امکانات تلاش کریں اور خود روزگار اختیار کرنے کے لیے آگے آئیں۔
کیا ہے ایروپونکس ٹیکنالوجی؟
ایروپونکس زراعت کی ایک جدید تکنیک ہے۔ اس میں پودوں کو مٹی کے بجائے ایک خصوصی ڈھانچے میں اگایا جاتا ہے۔ اس طریقے میں پودوں کی جڑوں کو ہوا میں کھلا رکھا جاتا ہے اور ان پر پانی اور ضروری غذائی اجزا کے محلول کا چھڑکاو کیا جاتا ہے۔ درجہ حرارت، نمی اور روشنی کو کنٹرول کرکے پودوں کی نشوونما کی جاتی ہے۔
ہندوستھان سماچار
---------------
ہندوستھان سماچار / عبدالسلام صدیقی