دہلی میں خواتین کے خلاف جرائم میں کمی، چھیڑ چھاڑ کے واقعات 63 فیصد کم ہوئے
نئی دہلی، 16 نومبر (ہ س)۔ دہلی میں گزشتہ ایک دہائی کے دوران خواتین کے خلاف جرائم میں نمایاں کمی درج کی گئی ہے۔ سال 2016 سے 2025 کے درمیان چھیڑ چھاڑ کے واقعات میں 63 فیصد، خواتین کی عزت و ناموس مجروح کرنے کے معاملات میں 59 فیصد اور عصمت دری اور بچوں
DELHI-WOMEN-CRIME-DECLINE


نئی دہلی، 16 نومبر (ہ س)۔ دہلی میں گزشتہ ایک دہائی کے دوران خواتین کے خلاف جرائم میں نمایاں کمی درج کی گئی ہے۔ سال 2016 سے 2025 کے درمیان چھیڑ چھاڑ کے واقعات میں 63 فیصد، خواتین کی عزت و ناموس مجروح کرنے کے معاملات میں 59 فیصد اور عصمت دری اور بچوں کے خلاف جنسی جرائم کے واقعات میں 25 فیصد کمی آئی ہے۔

سرکاری ذرائع کے مطابق دہلی پولیس کی جانب سے خواتین کی حفاظت کے لیے کیے جانے والے اقدامات کے ساتھ جرائم کی تحقیقات اور استغاثہ کے عمل میں تیزی لانے پر بھی خصوصی توجہ دی جا رہی ہے۔ سال 2016 میں خواتین کی عزت و ناموس مجروح کرنے کے 4,165 معاملات درج کیے گئے تھے، جو 2025 میں کم ہو کر 1,708 رہ گئے۔ اسی مدت کے دوران عصمت دری اور پوکسو (بچوں کو جنسی جرائم سے تحفظ فراہم کرنے سے متعلق قانون) کے تحت درج معاملات کی تعداد 2,155 سے گھٹ کر 1,608 اور چھیڑ چھاڑ کے واقعات 918 سے کم ہو کر 337 رہ گئے۔

مرکزی وزیر داخلہ اور تعاون امت شاہ نے 24 اکتوبر کو دہلی پولیس ہیڈکوارٹر میں خواتین کی حفاظت کے لیے تین ماہ کا عملی منصوبہ تیار کرنے کی ہدایت دی تھی۔ اس کے تحت عوامی مقامات کی حفاظت، سی سی ٹی وی نگرانی، خاتون پولیس اہلکاروں کی تعیناتی، ہنگامی امداد اور جرائم کی تحقیقات و سماعت میں تیزی لانے کے لیے کئی اقدامات کیے جا رہے ہیں۔

عوامی پارکوں اور حساس مقامات کی حفاظت کے لیے چھ ہزار سے زیادہ سی سی ٹی وی کیمرے نصب کیے جا چکے ہیں۔ مجموعی طور پر 19,822 تاریک اور غیر محفوظ مقامات کی نشاندہی کی گئی ہے، جنہیں سی سی ٹی وی نگرانی کے دائرے میں لایا جا رہا ہے۔ عوامی پارکوں میں حفاظتی انتظامات مضبوط کرنے کے لیے 1,635 پارکوں کا آڈٹ مکمل کیا جا چکا ہے۔ ان پارکوں میں چار دیواری، باڑ اور روشنی کے انتظامات بہتر بنائے جا رہے ہیں۔ تمام پارکوں میں چار دیواری اور باڑ لگانے کا کام 26 جنوری 2027 تک مکمل کرنے کا ہدف مقرر کیا گیا ہے۔

خواتین کی حفاظت کے لیے ہنگامی ردعمل امدادی نظام (ای آر ایس ایس)-112 کا اوسط ردعمل کا وقت 11 منٹ 53 سیکنڈ سے کم کرکے آٹھ منٹ دو سیکنڈ کر دیا گیا ہے۔ اس کے علاوہ 178 پنک اسکوٹیاں اور مکمل طور پر خاتون پولیس اہلکاروں کے ذریعے چلائی جانے والی 35 پی سی آر وین تعینات کی گئی ہیں۔ دہلی پولیس میں فی الحال خواتین اہلکاروں کی تعداد 17.3 فیصد ہے، جسے 2030 تک بڑھا کر 25 فیصد کرنے کا ہدف ہے۔

دارالحکومت میں قائم 125 پنک بوتھوں پر روزانہ اوسطاً 308 شکایت کنندگان پہنچ رہے ہیں۔ ہوائی اڈوں، ریلوے اور میٹرو پولیس تھانوں میں 24 گھنٹے خواتین کی مدد کے لیے ہیلپ ڈیسک کام کر رہے ہیں۔ ہر ضلع میں انسانی اسمگلنگ کی روک تھام کے لیے بھی ایک یونٹ تشکیل دیا گیا ہے۔ خواتین کے ساتھ بدسلوکی روکنے کے لیے چلائی جا رہی ’شائستگی‘ مہم کے تحت 17,387 مہمات چلائی گئیں، جن میں 1,24,010 افراد کے خلاف کارروائی کی گئی۔

خواتین کی حفاظت کے تعلق سے بیداری بڑھانے کے لیے 22,662 پروگرام منعقد کیے گئے، جن کے ذریعے تقریباً 15.9 لاکھ لوگوں تک رسائی حاصل کی گئی۔ خود حفاظتی تربیتی پروگراموں میں 5.7 لاکھ افراد نے حصہ لیا، جب کہ بچوں کے تحفظ سے متعلق اقدامات میں 3.4 لاکھ افراد شامل ہوئے۔ لڑکیوں کے اسکولوں، ہاسٹلوں، کالجوں اور ملازمت پیشہ خواتین کے ہاسٹلوں میں ہر ہفتے تقریباً 3,514 دورے کیے جا رہے ہیں۔ ان میں بیٹ پولیس اہلکاروں کے 1,869 اور تھانہ انچارجوں کے 882 دورے شامل ہیں۔

خواتین کے خلاف جرائم کی سماعت میں تیزی لانے کے لیے 25 خصوصی عدالتیں کام کر رہی ہیں، جب کہ مزید 37 عدالتیں قائم کی جا رہی ہیں۔ جنوری 2026 سے 31 اکتوبر تک عصمت دری اور پوکسو کے 1,225 معاملات درج کیے گئے، جن میں سے 81 فیصد معاملات میں چارج شیٹ داخل کی جا چکی ہے۔ دو ماہ کے اندر چارج شیٹ داخل کرنے کی مقررہ مدت پر 94 فیصد معاملات میں عمل کیا گیا۔ سال 2025 میں ان جرائم کے معاملات میں 99 فیصد چارج شیٹ داخل کی گئی تھیں۔

نامعلوم ملزمین سے متعلق معاملات میں ایف آئی آر درج ہونے سے چارج شیٹ داخل ہونے تک کا اوسط وقت 59 دن رہا۔ نوئیڈا بس معاملے میں 44 دن اور سروپ نگر بلائنڈ مرڈر معاملے میں 29 دن کے اندر چارج شیٹ داخل کی گئی۔ عادی جنسی مجرموں کی ضمانت منسوخ کرانے کے لیے معیاری عملی طریقہ کار (ایس او پی) تیار کیا جا رہا ہے۔ اس کے ساتھ ہی بھارتیہ شہری سرکشا سنہتا (بی این ایس ایس) کی دفعات کے تحت معاملات میں ڈی این اے جانچ بھی کرائی جا رہی ہے۔

ہندوستھان سماچار

ہندوستھان سماچار / محمد شہزاد


 rajesh pande