چنئی، 14 نومبر (ہ س)۔ چنئی میں پلاسٹک کی بوتلیں اور ڈبے بنانے والی ایک فیکٹری سے چھپا کر رکھا گیا 50 کلوگرام سیوڈوایفیڈرین کیمیکل ضبط کیا گیا ہے۔ بین الاقوامی بازار میں اس کی قیمت تقریباً ایک کروڑ روپے بتائی گئی ہے۔ منشیات کی تیاری میں استعمال ہونے والے اس کیمیکل کی اسمگلنگ کے الزام میں باپ بیٹے سمیت تین افراد کو گرفتار کیا گیا ہے۔

نارکوٹکس کنٹرول ڈپارٹمنٹ کو خفیہ اطلاع ملی تھی کہ چنئی کے ایم کے بی نگر واقع انّئی اندرا نگر میں قائم ایک فیکٹری میں منشیات بنانے میں استعمال ہونے والا سیوڈوایفیڈرین کیمیکل چھپا کر رکھا گیا ہے۔ اس اطلاع کی بنیاد پر محکمے کے افسران نے 13 نومبر کی رات فیکٹری پر چھاپہ مارا۔ اس دوران دو بوریوں سے تقریباً 25-25 کلوگرام کے حساب سے مجموعی طور پر 50 کلوگرام کیمیکل برآمد ہوا۔ افسران نے کیمیکل ضبط کرنے کے ساتھ اسمگلنگ میں ملوث تین افراد کو گرفتار کر لیا۔ گرفتار ملزمان میں باپ اور بیٹا بھی شامل ہیں۔

افسران کے مطابق ابتدائی تحقیقات میں معلوم ہوا ہے کہ یہ کیمیکل حیدرآباد سے چنئی لایا گیا تھا۔ اس کا استعمال غیر قانونی طور پر منشیات تیار کرکے بیرون ملک برآمد کرنے کے لیے کیا جانا تھا۔

تحقیقات میں یہ بات بھی سامنے آئی ہے کہ چنئی کو مرکز بنا کر سرگرم ایک بین الاقوامی اسمگلنگ گروہ ایفڈرین اور سیوڈوایفیڈرین جیسے کیمیکلز کی آسٹریلیا، نیوزی لینڈ سمیت دیگر ممالک میں اسمگلنگ کرتا رہا ہے۔

افسران گرفتار تینوں ملزمان کے کردار، کیمیکل کے اصل ذرائع، اسے کس ملک میں بھیجنے کا منصوبہ تھا اور اس معاملے میں سرگرم ملکی و بین الاقوامی اسمگلنگ گروہوں کے نیٹ ورک کی جانچ کر رہے ہیں۔

نارکوٹکس کنٹرول ڈپارٹمنٹ نے کہا ہے کہ منشیات کی اسمگلنگ کرنے والے گروہوں کا خاتمہ کرنے اور منشیات کی تیاری میں استعمال ہونے والے کیمیائی خام مال کے غیر قانونی استعمال کو روکنے کے لیے کارروائی جاری رہے گی۔

محکمے نے عام لوگوں سے اپیل کی ہے کہ منشیات کی اسمگلنگ سے متعلق کسی بھی قسم کی اطلاع قومی نارکوٹکس انسداد ہیلپ لائن نمبر 1933 پر دیں۔

ہندوستھان سماچار

---------------

ہندوستھان سماچار / عبدالواحد