نئی دہلی/حیدرآباد، 11 نومبر (ہ س)۔ کچرے کے مسئلے کو آمدنی کے نئے ذریعے میں تبدیل کرنے کی سمت میں بِٹس پلانی کے حیدرآباد کیمپس کے محققین نے ایک منفرد ٹیکنالوجی تیار کی ہے۔ محض 2500 روپے کی لاگت سے تیار ہونے والا یہ نظام ہوٹلوں، اسپتالوں، رہائشی سوسائٹیوں اور تعلیمی اداروں سے نکلنے والے گیلے کچرے کو پروٹین سے بھرپور جانوروں کے چارے میں تبدیل کرسکتا ہے۔ اس ٹیکنالوجی میں بلیک سولجر فلائی کے لاروا استعمال کیے گئے ہیں، جو نامیاتی کچرے کو تیزی سے غذائیت سے بھرپور بایوماس میں تبدیل کرتے ہیں۔ ابتدائی تجربات میں روزانہ تقریباً دو کلو لاروا کی پیداوار درج کی گئی ہے۔

بِٹس پلانی کے اسسٹنٹ پروفیسر شنکر گنیش پلانی اور ریسرچ اسکالر ڈاکٹر اتون رائے چودھری نے یہ کم لاگت والا آلہ تیار کیا ہے، جسے عام ہارڈویئر دکانوں پر دستیاب سامان سے بنایا جاسکتا ہے۔ اس میں دو اہم حصے ہیں، جہاں مکھیوں کے انڈوں سے لاروا تیار ہوتے ہیں اور بعد میں انہیں جمع کیا جاتا ہے۔ محققین کے مطابق لاروا تقریباً دو ہفتوں میں پھلوں، سبزیوں اور باورچی خانے کے بچے ہوئے کھانے کو بایوماس میں تبدیل کردیتے ہیں۔ ان میں تقریباً 20 فیصد پروٹین اور 25 فیصد چکنائی پائی جاتی ہے، جس کی وجہ سے انہیں مرغیوں، خنزیروں اور مچھلیوں کی خوراک کے متبادل ذریعے کے طور پر استعمال کیا جاسکتا ہے۔

محققین کے ابتدائی تجربے میں لاروا پر مبنی خوراک حاصل کرنے والے چوزوں کا وزن 142 سے 145 گرام تک پہنچا، جبکہ گیہوں کا چوکر کھانے والے چوزوں کا وزن 121 سے 128 گرام رہا۔ اس ٹیکنالوجی سے پولٹری فارمنگ کی لاگت کم کرنے کے ساتھ کچرے کی نقل و حمل، بدبو اور ماحولیاتی آلودگی میں بھی کمی لانے کی امید ہے۔ لاروا کے استعمال کے بعد بچنے والے مادے کو مناسب پروسیسنگ کے بعد نامیاتی کھاد کے طور پر بھی استعمال کیا جاسکتا ہے۔ تاہم بڑے پیمانے پر تجارتی استعمال سے پہلے خوراک کے معیار اور حفاظت کی مزید جانچ ضروری ہوگی۔

ہندوستھان سماچار

---------------

ہندوستھان سماچار / عبدالواحد