وارانسی، یکم نومبر (ہ س)۔ اتر پردیش کے ضلع وارانسی میں لنکا تھانہ علاقے کے تحت ایک کرائے کے مکان میں چل رہی غیر قانونی اسلحہ فیکٹری پر چھاپہ مار کر اس کا پردہ فاش کیا گیا ہے۔ پولیس نے موقع سے دو ملزم اسمگلروں کو گرفتار کیا ہے۔

اے ڈی سی پی ویبھو بانگر نے اتوار کو صحافیوں کو بتایا کہ ایک پولیس اہلکار پر حملے کا واقعہ پیش آیا تھا۔ اس معاملے میں پولیس تحقیقات کر رہی تھی۔ تفتیش کے دوران امن نامی نوجوان کو حراست میں لے کر پوچھ گچھ کی گئی تو اس نے غیر قانونی اسلحہ فیکٹری کے بارے میں معلومات فراہم کیں۔ فیکٹری کی اطلاع ملتے ہی پولیس ٹیمیں امن کو ساتھ لے کر سامنے گھاٹ کے شیواجی نگر کالونی میں واقع کرائے کے مکان پر پہنچیں۔

کارروائی کے وقت اجنی نندن جھا کے اہل خانہ بھی موجود تھے۔ تلاشی کے دوران موقع پر اسلحہ تیار کیا جاتا ہوا پایا گیا۔ پولیس نے وہاں سے تین دیسی پستول (32 بور)، 143 زندہ کارتوس، 24 خالی کارتوس کے خول، ہتھیار بنانے کی مشینیں، اوزار، لوہے کے ٹکڑے، دھات، مائع مادے اور ناپ تول کرنے والی مشینیں برآمد کیں۔

اے ڈی سی پی نے بتایا کہ پولیس ٹیم اس گروہ سے وابستہ اجنی نندن جھا، راجو تیواری اور راج وشوکرما کو پہلے ہی گرفتار کر چکی ہے۔ اس گروہ سے تعلق رکھنے والے دیگر ملزمان کی گرفتاری کے لیے پولیس ٹیمیں تعینات کی گئی ہیں۔ برآمد شدہ ہتھیاروں کے ذرائع اور سپلائی نیٹ ورک کی بھی تحقیقات کی جا رہی ہیں۔

انہوں نے بتایا کہ اس کارروائی میں شامل پولیس ٹیم کو ایک لاکھ روپے کا انعام دیا جا رہا ہے۔

ہندوستھان سماچار

---------------

ہندوستھان سماچار / عبدالواحد