کٹھمنڈو، 4 اکتوبر (ہ س)۔ نیپال کے انر مدھیش کے اضلاع کو دہلا چکا اسکرب ٹائفس ملک بھر میں پھیل گیا ہے۔ سرکاری اعداد و شمار کے مطابق، جنوری 2026 سے ہفتہ تک نیپال میں 9,872 افراد اسکرب ٹائفس سے متاثر ملے ہیں۔ وبائی امراض اور امراض پر قابو پانے کے ڈویژن کے شعبہ نگرانی اور تحقیق امراض کے سربراہ ہیم راج پانڈے کے مطابق، ڈولپا، منانگ اور موگو کو چھوڑ کر 74 اضلاع میں انفیکشن کی تصدیق ہوئی ہے۔

اس مدت میں اسکرب ٹائفس سے 22 افراد کی موت ہو گئی۔ تاہم، ان تمام اموات کی وجہ اسکرب ٹائفس ہی تھا یا نہیں، اس کی تصدیق ابھی باقی ہے اور جانچ جاری ہے۔ اسکرب ٹائفس سے سب سے زیادہ متاثر سلیان ضلع کے دارما پہنچے پانڈے نے بتایا کہ کھیتی کے سیزن میں کِلنی (مائٹ) سرگرم ہو جاتی ہیں اور چِگاس مائٹ کے لاروا کی تعداد بڑھ جاتی ہے، جس سے انفیکشن پھیلنے کا خطرہ بڑھ جاتا ہے۔

انہوں نے کہا کہ صحت کے اداروں میں اس کا علاج باآسانی اور مفت دستیاب ہے، لیکن سلیان میں اموات کی تعداد زیادہ ہونے کی وجہ سے اس کے اسباب کا مطالعہ کیا جا رہا ہے۔ دوسری جنگ عظیم کے دوران جاپان میں پھیلنے والا اسکرب ٹائفس نیپال میں 1981 میں سامنے آیا تھا۔ سال 2015 کے زلزلے کے بعد نیپال میں اس کے انفیکشن میں اضافہ دیکھا گیا ہے۔

ابتدائی سالوں میں یہ بیماری چتون، نول پراسی سمیت ترائی کے اضلاع میں زیادہ سرگرم تھی، لیکن حالیہ برسوں میں اس کا پھیلاو پہاڑی اور ہمالیائی اضلاع تک ہو گیا ہے۔ ڈویژن کے ویکٹر بورن ڈیزیز کنٹرول برانچ کے سربراہ ڈاکٹر گوکرن داہال کے مطابق، اسکرب ٹائفس تقریباً پانچ سال پہلے ہی پہاڑی اضلاع تک پہنچ چکا تھا۔ انہوں نے کہا کہ پہلے یہ بیماری ترائی اور انر مدھیش میں زیادہ دیکھی جاتی تھی، لیکن پچھلے چند برسوں میں پہاڑی علاقوں میں بھی مریضوں کی تعداد بڑھی ہے۔

ڈاکٹر داہال نے کہا کہ بیماری کا خطرہ بڑھ رہا ہے، حالانکہ وقت پر علاج ملنے پر مریض پوری طرح ٹھیک ہو سکتا ہے اور اس سے شرح اموات کم ہے۔ سرکاری اعداد و شمار کے مطابق، مالی سال 2023 میں 9,330، 2024 میں 11,500 اور 2025 میں تقریباً 7,300 افراد میں اسکرب ٹائفس کا انفیکشن پایا گیا تھا۔ رواں سال کے ابتدائی مہینوں میں ہی 5,500 سے زائد معاملات سامنے آنے کی وجہ سے اندازہ لگایا جا رہا ہے کہ مارچ تک متاثرین کی تعداد تقریباً 11 ہزار تک پہنچ سکتی ہے۔

ڈاکٹر داہال کے مطابق، اسکرب ٹائفس بیکٹیریا سے ہونے والی بیماری ہے اور اس کے علاج کی دوائیں باآسانی دستیاب ہیں۔ لیکن مریضوں کے اسپتال پہنچنے میں تاخیر کرنے پر بیماری سنگین رخ اختیار کر سکتی ہے۔ انہوں نے کہا کہ اس بار سلیان میں اچانک اتنے زیادہ معاملات اور اموات کیوں ہوئیں، اس کا پتہ لگانے کے لیے ماہرین کی ٹیم جائزہ لے رہی ہے۔

ہندوستھان سماچار

---------------

ہندوستان سماچار / انظر حسن