نئی دہلی، 4 اکتوبر (ہ س)۔

بھارتیہ جنتا پارٹی (بی جے پی) کی مرکزی انتخابی کمیٹی نے اتراکھنڈ میں ہونے والے راجیہ سبھا کے دو سالہ انتخابات اور مغربی بنگال میں ہونے والے راجیہ سبھا ضمنی انتخاب کے لیے امیدواروں کے ناموں کی منظوری دے دی ہے۔ پارٹی نے اتراکھنڈ سے دنیش آریہ اور مغربی بنگال سے رکمنی ملک (کوئل ملک) کو امیدوار بنایا ہے۔

بی جے پی کی جانب سے اتوار کو جاری پریس ریلیز کے مطابق مرکزی انتخابی کمیٹی نے دونوں ریاستوں کے امیدواروں کے ناموں کو منظوری دے دی ہے۔

اتراکھنڈ میں راجیہ سبھا کی ایک نشست کے لیے دو سالہ انتخاب ہونا ہے۔ اس کے لیے پارٹی نے دنیش آریہ کو امیدوار قرار دیا ہے۔

وہیں مغربی بنگال میں راجیہ سبھا کی ایک نشست پر ہونے والے ضمنی انتخاب کے لیے رکمنی ملک، جو کوئل ملک کے نام سے جانی جاتی ہیں، کو بی جے پی نے اپنا امیدوار بنایا ہے۔

دنیش آریہ اتراکھنڈ میں ریاستی سطح کی پینے کے پانی کی نگرانی کونسل کے نائب صدر، وزیرِ مملکت کے درجے پر، رہ چکے ہیں۔ وہ وزیراعلیٰ پشکر سنگھ دھامی کے تعلقاتِ عامہ کے افسر، بی جے پی کے نینی تال کے سابق ضلعی صدر اور درج فہرست ذات مورچہ کے قومی وزیر بھی رہ چکے ہیں۔

دوسری جانب رکمنی ملک کوئل ملک کے نام سے معروف ہیں۔ وہ اداکارہ اور سیاست دان ہیں اور بنیادی طور پر بنگالی فلموں میں اپنے کام کے لیے جانی جاتی ہیں۔ وہ ترنمول کانگریس کی راجیہ سبھا رکن بھی رہ چکی ہیں۔

مغربی بنگال میں راجیہ سبھا کی ایک نشست خالی ہوئی ہے۔ اس نشست سے ترنمول کانگریس کی راجیہ سبھا رکن رکمنی ملک نے 16 جولائی کو استعفیٰ دیا تھا۔ ان کی مدتِ کار 2 اپریل 2032 تک تھی۔ اسی خالی نشست پر ضمنی انتخاب کرایا جائے گا۔

قابلِ ذکر ہے کہ اتر پردیش کی 10 اور اتراکھنڈ کی ایک راجیہ سبھا نشست پر دو سالہ انتخابات، جبکہ مغربی بنگال کی ایک نشست پر ضمنی انتخاب 16 اکتوبر کو کرایا جائے گا۔ اتر پردیش اور اتراکھنڈ کے 11 راجیہ سبھا ارکان کی مدتِ کار رواں سال نومبر میں ختم ہو رہی ہے۔ اسی کے باعث ان نشستوں پر دو سالہ انتخابات کرائے جا رہے ہیں۔

امیدوار 6 اکتوبر تک کاغذاتِ نامزدگی داخل کر سکیں گے۔ 7 اکتوبر کو نامزدگی کے کاغذات کی جانچ ہوگی۔ امیدوار 9 اکتوبر تک اپنے نام واپس لے سکیں گے۔ 16 اکتوبر کو صبح 9 بجے سے شام 4 بجے تک ووٹنگ ہوگی اور اسی روز شام 5 بجے ووٹوں کی گنتی شروع ہوگی۔ انتخابی عمل 19 اکتوبر تک مکمل کر لیا جائے گا۔

ہندوستھان سماچار

ہندوستان سماچار / عطاءاللہ