پٹنہ، 20 اکتوبر (ہ س)۔ بہار کے دارالحکومت پٹنہ کے پھلواری شریف تھانہ علاقے کے ببھن پورہ گاؤں میں منگل کی صبح ایک سنسنی خیز واردات پیش آئی، جہاں 30 سالہ دیپک کمار کو مبینہ طور پر اس کے چچا للن شرما نے گولی مار کر قتل کر دیا۔ الزام ہے کہ ملزم نے پستول سے یکے بعد دیگرے پانچ گولیاں چلائیں، جس سے دیپک کی موقع پر ہی موت ہو گئی۔ واردات کے بعد ملزم ہتھیار لے کر فرار ہو گیا۔ پولیس معاملے کی تفتیش میں مصروف ہے۔

مقتول کی شناخت ببھن پورہ کے رہنے والے وندھیاچل شرما کے بیٹے دیپک کمار کے طور پر ہوئی ہے۔ بتایا جاتا ہے کہ دیپک ماضی میں وکرم اسمبلی حلقے کے رکن اسمبلی سدھارتھ شرما کی گاڑی کا چکا تھا۔ معلومات کے مطابق منگل کی صبح تقریباً سات بجے فائرنگ کی آواز سے علاقے میں افراتفری مچ گئی۔ واقعے کے بعد گاؤں میں غم و غصے کا ماحول پیدا ہو گیا۔ اہل خانہ کی چیخ و پکار سے پورا ماحول سوگوار ہو گیا۔ مقتول کی اہلیہ کویتا کماری جائے واردات پر روتی بلکتی رہیں۔

واقعے کی اطلاع ملتے ہی پھلواری شریف کے سب ڈویژنل پولیس افسر نارائن اپادھیائے اور تھانہ انچارج غلام محمد شہباز عالم پولیس فورس کے ساتھ موقع پر پہنچے۔ پولیس نے جائے واردات کو محفوظ کرکے تفتیش شروع کر دی۔

پولیس نے معاملے کی سائنسی بنیادوں پر جانچ کے لیے فارنسک سائنس لیبارٹری (ایف ایس ایل) کی ٹیم کو بھی طلب کیا۔ ٹیم نے جائے واردات سے شواہد جمع کیے۔ کارروائی مکمل ہونے کے بعد صبح تقریباً 9 بج کر 50 منٹ پر لاش کو پوسٹ مارٹم کے لیے ایمس پٹنہ بھیج دیا گیا۔

ابتدائی معلومات میں قتل کی دو ممکنہ وجوہات سامنے آئی ہیں۔ پہلی وجہ چچا اور بھتیجے کے درمیان زمین کا تنازع بتائی جا رہی ہے۔ وہیں تفتیش کے دوران مقتول کی اہلیہ کویتا کماری اور ملزم للن شرما کے درمیان مبینہ ناجائز تعلقات کو لے کر تنازع کی بات بھی سامنے آئی ہے۔

ابتدائی اطلاعات کے مطابق کویتا کماری اور للن شرما کے درمیان تقریباً چار سال سے مبینہ تعلقات کی چہ میگوئیاں تھیں۔ بتایا جا رہا ہے کہ اسی معاملے کو لے کر منگل کی صبح گھر میں بحث ہوئی، جس کے بعد تنازع بڑھ گیا۔ الزام ہے کہ اسی دوران للن شرما پستول لے کر آیا اور دیپک پر پانچ گولیاں چلا دیں۔

حالانکہ ان الزامات اور دعوؤں کی آزادانہ طور پر تصدیق نہیں ہوئی ہے۔ پولیس نے ابھی تک قتل کی کسی ایک وجہ کو حتمی طور پر تسلیم نہیں کیا ہے اور دونوں پہلوؤں سے تفتیش کی جا رہی ہے۔

پولیس جائے واردات اور آس پاس نصب سی سی ٹی وی کیمروں کی فوٹیج کی جانچ کر رہی ہے۔ بتایا جا رہا ہے کہ قتل کا واقعہ گھر میں لگے کیمرے میں ریکارڈ ہوا ہے۔ پولیس فوٹیج کی مدد سے واردات کے پورے سلسلے کو سمجھنے کی کوشش کر رہی ہے۔

اس کے علاوہ واردات میں استعمال ہونے والے ہتھیار، فائرنگ کے طریقے اور جائے واردات سے ملنے والے دیگر شواہد کی بھی جانچ کی جا رہی ہے۔ فی الحال ملزم للن شرما کے فرار ہونے کی اطلاع ہے اور پولیس معاملے کی مزید تفتیش میں مصروف ہے۔

ہندوستھان سماچار

---------------

ہندوستان سماچار / Mohammad Afzal Hassan