کٹیہارمیں غیر قانونی یوریا کی 200 بوریاں ضبط، اسمگلنگ کے الزام میں ایک گرفتار، ٹریکٹر بھی ضبط

کٹیہار، 19 اکتوبر(ہ س)۔ بہار کے کٹیہار ضلع کے کورسیلا تھانہ پولیس نے خفیہ اطلاع کی بنیاد پر کارروائی کرتے ہوئے غیر قانونی یوریا کھاد کی بڑی کھیپ ضبط کی ہے۔ پولیس نے ٹریکٹر پر لدی یوریا کی 200 بوریاں برآمد کرکے بھاگلپور ضلع کے ایک شخص کو گرفتار کرلیا۔

پولیس کے مطابق کورسیلا تھانہ انچارج کو اطلاع ملی تھی کہ نوگچھیا (بھاگلپور) کی جانب سے ایک ٹریکٹر پر غیر قانونی یوریا کھاد لاد کر پی ڈبلیو ڈی میدان کے راستے کورسیلا لائی جا رہی ہے۔ اطلاع کی تصدیق اور کارروائی کے لیے تھانہ انچارج کی قیادت میں پولیس ٹیم نے پی ڈبلیو ڈی میدان کے قریب گاڑیوں کی جانچ شروع کی۔

جانچ کے دوران پولیس کو دیکھ کر ٹریکٹر ڈرائیور نے تیزی سے فرار ہونے کی کوشش کی، لیکن پولیس اہلکاروں نے گھیراؤ کرکے اسے موقع پر ہی پکڑ لیا۔ گرفتار شخص کی شناخت چمک لال شرما ولد چھتری شرما ضلع بھاگلپور کے طور پر ہوئی ہے۔

ٹریکٹر کی تلاشی لینے پر اس سے غیر قانونی یوریا کھاد کی 200 بوریاں برآمد ہوئیں۔ پولیس نے کھاد سمیت ٹریکٹر کو ضبط کرلیا ہے۔ گرفتار ملزم کے خلاف متعلقہ دفعات کے تحت مقدمہ درج کرکے مزید قانونی کارروائی شروع کردی گئی ہے۔

ہندوستھان سماچار

ہندوستان سماچار / Mohammad Afzal Hassan